InfoHub Logo

Ordabasy – Ońtústik Qazaqstan oblysy, Ordabasy aýdanyndaǵy taýly óńir. Ordabasy taýynyń qoınaýynda 1726 jyly Orda tigilip, qazaqtyń úsh júziniń ıgi jaqsylarynyń basy qosylyp, jońǵar basqynshylyǵyna qarsy kúreske halyqty jumyldyrý jaıy talqylandy. Bul jıyn-qazaq eli tarıhyndaǵy asa aýyr syn kezinde, halyqtyń rýhyn kóterip, ulttyq namystyń otyn jaqqan, júrekke jiger, boıǵa qýat berip, aldaǵy uly shaıqastarǵa bir­tutas el bolyp attanýdyń taǵdyryn shesh­ken asa mańyzdy oqıǵa bolyp sanalady. Osy kezden bastap-aq, ol kıeli, áýlıeli jer sanalyp keledi. "Kúltóbeniń basynda kúnde jıyn"-degen sóz sol zamannan qalǵan.

Sol joly birtutas qazaq áskeri qurylyp, Bas qolbasshy saılandy. Batyrlyǵy, ádis-aılasy, soǵys tásiline jetiktigimen tanylǵan kishi júz hany Ábilqaıyr - úsh júzdiń birikken qazaq jasaǵyna Bas qolbasshy boldy. Ordabasydaǵy sol batalasý - bátýáli boldy. Qazaq jeńiske jetti. Jońǵardan el azat etildi. Odan keıin de ult basyna talaı náýbet tóndi. Qazaq talaı márte qarý ustap, atqa qondy. Uzaq júrip, taıtalaspen, jantalaspen júrip, Táýelsizdikke de ıe boldy. Ordabasy taýy-qazaq eli úshin bereke-birliktiń bastaýy ispetti.  Bul taýǵa zıarat etýshiler Jaratýshy Qudiretten: «Elime, jurtyma, áýletime, otbasyma bereke-birlik ber, zamanymyz tynysh bolsyn, ómirimiz beıbit bolsyn», – degen tilek tilep barady.

«Ordabasy – el júregi, jer kindigi».  N.Nazarbaev
«Ordabasy – qazaq rýhynyń qaǵbasy». Á.Kekilbaev

Ordabasy taýynyń shyńynda monýment kórinip tur, bul sol batyrlyq jyldar jaıynda eske túsiretin 28 m bıiktiktegi stela. Úsh qyrly stela aq mármárden jasalǵan taqtalarmen qaptalǵan. Onyń ár qyry Qazaqstannyń ár shetine baǵyttalǵan sıaqty: Syrdarıa jaǵyna – batysta, Qarataý taýlaryna – soltústikte, Qazyǵurt taýlaryna - ońtústik-shyǵysta. Stelanyń ár qyrynda úsh uly bıdiń aıtqan sózderi jazylǵan taqtaıshalar bar. Bul jer qazaq halqynyń tarıhı, mádenı jáne rýhanı kórikti jeri retinde belgilenýi tıis.

---