InfoHub Logo

Densaýlyq.
Oqý qyzmeti: Qaýipsiz minez - qulyq erejeleri.
Taqyryby: Órt jáne onyń saldary
Maqsaty: Balalarǵa órt qaýipsizdigi erejesin jetik bilýdiń mańyzyn uǵyndyrý. Ózin - ózi qorǵaýǵa, qorshaǵan ortany qorǵaýǵa jáne órt bolǵan jaǵdaıdaǵy qarapaıym erejelerdi úıretý. Uqyptylyqqa, ózin - ózi qorǵaýǵa, adamgershilikke tárbıeleý.
Qajetti quraldar men kórnekilikter: órt týraly mazmundy sýretter, sirińke, útik, gaz plıtasy, temeki tuqyly sýretteri, úsh tárelke, ydystaǵy sý, topyraq, qalyń mata, órt sóndirýshi aǵaı, oıynshyq kólikter.

Jylýlyq sheńberi
Ot jaqpa kúıersiń,
Órtenip júrersiń.
Sirińkeni ustasań,
Bálege sen túsersiń.

Ottyń isi qýyrmaq
Jeldiń isi sýyrmaq
Qazir janǵan jalyndy,
Alyp - ushyp qýalamaq.

Órt sóndirýshi mashınanyń dybysy estiledi.
- Balalar, bul neniń dybysy, sender estip jatsyńdar ma?
- Durys aıtasyńdar, bul órt sóndirýshi mashınanyń dybysy. Al ol qaıda asyǵyp bara jatyr?
- Ia balalar, ol órt sóndirýge asyǵyp bara jatyr. Qane kim aıtady, órt sóndirýshi mashına qandaı bolady?

- Durys aıtasyńdar, nege qyzyl tústi bolady?

- Óte durys, al myna kólikter ishinen kim órt sóndirýshi mashınany taýyp beredi?
- Durys tapty ma balalar.
- Al bul kólikti júrgizip, órt sóndiretin maman ıesin kim dep ataımyz?
- Durys aıtasyńdar. (órt sóndirýshi kirip keledi)
Balalarmen amandasady.
Tárbıeshi: Sizderdiń órt sóndirýge asyǵatynyńyz týraly balalar biledi, al órttiń shyǵýyna ne sebep bolady?
Órt sóndirýshi:
Ot - ómirimizge qýat berip, boıymyzdy jylytady. Ot ómir sáni. Otsyz tirshilik joq. Ot jaǵylmasa tamaǵymyz da pispeıdi, úıimizde jylymaıdy. Al tamaq ishpesek boıymyzǵa qýat bitpeıdi. Boıymyzda qýat bolmasa, ómirge degen qyzyǵýshylyǵymyz joǵalady.
Otsyz tońyp, jaýraǵan adam eshqandaı eńbek te isteı almaıdy. Sonymen ot ómirimiz desek te, onyń álemi jaılaǵan alapattyń biri - órt qaýpin shyǵaratynyn da esten shyǵarmaý jón bolar. Ózimizdiń uqypsyzdyǵymyzdan keıde órttiń qalaı kúsh alyp ketkenin baıqamaı qalamyz.
Búgin balalar, men senderdiń bilimderińdi baıqaıyn dep birneshe oıyndar alyp keldim.
« Oılan, tap» dıdaktıkalyq oıyny.
Oıyn sharty: kóptegen zattyq sýretterdiń ishinen órt shyǵýǵa sebepti zattardyń sýretterin taýyp kórsetý.
(Taqtada útik, gaz plıtasy, oryndyq, gúl, sirińke, qolshatyr, temeki tuqyly, dıvan sýreteri )

- Jaraısyńdar balalar, tamasha.
Balalar endi sendermen taǵy da « Ne ister ediń?.» oıynyn oınaǵym kep tur.
Men suraqtar qoıamyn, al sender jaýap beresińder.
- Sen úıde jalǵyz qaldyń. Ata - anań qonaqqa ketti. Kenet elektr togynyń pyshyrlap jana bastaǵanyn baıqadyń.
Ne ister ediń?
- Úıge kóp qonaq keldi. Shaı iship bolǵan soń úlken kisiler temeki tartýǵa syrtqa shyqty. Sóıtti de bir kisiniń shekken temekisiniń tuqylynan jerdegi qýraǵan shóp jana bastady. Mundaı jaǵdaıda ne isteısiń?
- Úıge anań ot jaǵyp, ózi dalaǵa shyǵyp ketti. Janyp jatqan peshtiń esigi ashylyp, ishinen janǵan ot túsip ketti. Sen ne ister ediń?
- Jaraısyńdar balalar, esterińde bolsyn, órt kezdeısoq shyqpaıdy, ol durys paıdalanbaǵannan bolady.
- Balalar otty qalaı óshirýge bolady?
- Qazir men senderge birneshe ádisin kórsetemin.
1 - tájirıbe: tárelkedegi janyp turǵan qaǵazǵa sý quıý.
- demek órtti sý óshiredi.
2 - tájirıbe: tárelkedegi janyp turǵan qaǵazǵa qum nemese topyraq sebý.
- sý bolmaǵan jaǵdaıda órtke qum nemese topyraq shashsań óshedi, tipti gúl otyrǵyzylǵan qumyradaǵy topyraqty da shashýǵa bolady.
3 - tájirıbe: tárelkedegi janyp turǵan qaǵazdy qalyń matamen jabý.
- janyp jatqan zatty qalyń kórpemen nemese aýa ótkizbeıtindeı qalyń matamen japsań, ot óship qalady. Sebebi ot janý úshin aýa qajet, aýa jetpegendikten ot óshedi.

Al endi ot týraly maqal - mátelder aıtaıyq
Otpen oınama kúıersiń.

Oıyn túbi – ot.

Otyn degen shóp bolar,
Jınaı berseń kóp bolar.

Ot jaqpa pisersiń,
Or qazba túsersiń.

«Bolady - bolmaıdy» dıdaktıkalyq oıyny.
Oıyn sharty: qoldaryna qyzyl jáne kók tústi belgilerdi alyp, bolmaıtyn jaǵdaıda qyzyl tústi, bolatyn jaǵdaıda kók tústi kóterý.
- Órt bolǵanda 101 nómirine qońyraý shalýǵa.....
- Janyp turǵan sirińkeni tastaýǵa...
- Úlkenderdi aıqaılap kómekke shaqyrýǵa...
- Órt shyqqan jerde qalýǵa...
- Basymyzdy, bet - aýzymyzdy ylǵal súlgimen oraýǵa...
- Órt kezinde gazdy, jaryqty, toqqa qosylatyn quraldardy qosýǵa...
- Qoryqpaı órt sóndirýshilerdiń aıtqanyn tyńdaýǵa...
- órt kezinde kereýet astyna, shkaf ishine tyǵylýǵa....
Órt sóndirýshi:- Jaraısyńdar balalar, sender endi órt týraly, ony óshirý týraly kóp biletin boldyńdar. Men senderdiń árqashan muqıat bolyp, otpen oınamaıtyndaryńa senimdimin.
- Balalar búgin sender ottyń dos ta, jaýymyz bola alatynyna kóz jetkizdińder. Esterińde bolsyn: «Otpen oınama, kúıersiń»
«Órt - tilsiz jaý»

Jambyl oblysy, Baızaq aýdany,
Sarykemer aýyly, "Baldyrǵan" balabaqshasy tárbıeshisi
Alıbekova Ulmeken Mýhambetovna