InfoHub Logo

Úıdegi tynyshtyqtyń, túsinistiktiń eń negizgi qaǵıdalarynyń biri – syrttaǵy adamdarmen qalaı sypaıy jáne jaqsy mámilede bolsaq, dál sondaı mámileniń januıa ishinde de bolýy! Syılastyq bolǵan úıde baq-bereke de bolady.

Ertede bir jas jigit otbasy ishinde qalaı baqyt pen tynyshtyq ornatýǵa bolatynyn izdeıdi. Adamdar oǵan «Pálen aýylda bir shal men kempir bar, bilse solar biledi baqytty turmystyń syryn, óıtkeni olardyń urysqanyn, bir-birine daýys kótergenin áli eshkim kórgen emes» deıdi. Jas jigit álgi aıtylǵan úıge baryp, amandasyp, hal-jaǵdaı surasqannan keıin úı ıesine kelgen sebebin aıtady. Qart kisi dastarhan basyna qonaqty jaıǵastyryp otyrǵyzady. Kempiri dastarhanǵa bir qaýyn ákeledi. Qart kisi qaýynǵa bir qaraıdy da, kempirine: «Bul qaýyn onsha pispegenge uqsaıdy, aýystyryp ákelesiń be» deıdi. Áıeli jaraıdy dep qaýyndy keri áketip, taǵy bir qaýyn ákeledi. Kúıeýi «Bul da bolmady, taǵy basqasyn kórshi» deıdi. Áıeli jaraıdy dep, taǵy alyp ketedi. Qart kisi kelgen qonaqqa: «Áıelim onsha tańdaı almasa kerek, kettik birge baryp tańdap keleıik», dep ekeýi birge as úıge kiredi. As úıge kirgeninde bir ǵana qaýyn turǵanyn kóredi. Qart kisi qonaqqa qarap: «Otbasy baqytynyń syryn túsindiń be» dep suraıdy. Jas jigit «túsinbedim» dep jaýaptaıdy. «Balam, úıde bir ǵana qaýyn bar edi. Men biletinmin bireý ǵana ekenin, meniń biletinimdi áıelim de biledi. Men qaýyndy alyp ketip basqasyn ákel degenimde, jaraıdy dep áketip dál sony qaıta ákeldi. “Eı, shal, sen aljyǵanbysyń, úıde bir ǵana qaýyn bar, ne aıtyp tursyń” demedi. Men bir nárse aıtqanymda áıelim qarsy shyqpaıdy, dereý aıtqanymdy oryndaıdy. Ol da bir nárse aıtqanynda men de onyń kóńilin qaldyrmaımyn. Sol sebepti urys-keris te bolmaıdy. Otbasy baqytynyń syry osy» deıdi.

---