InfoHub Logo

2026 jyldyń 2 naýryzynan bastap «Otbasy bank» turǵyn úı kezegindegi azamattar úshin jańa erejelerdi qoldanysqa engizedi. Jańa talaptarǵa sáıkes, mindetti túrde derekterdi tekserýden ótpegenderge páter nemese jeńildetilgen nesıe berilmeıtin bolady. Bul týraly bank baspasóz qyzmeti habarlady.

Jańa júıeni engizýdegi maqsat – azamattardyń ótinish berý kezindegi málimetteriniń ózektiligin tekserý. Bul otbasy quramy, sanaty, sondaı-aq turǵyn úı jaǵdaıy týraly aqparattardy qamtıdy. Atalǵan prosedýrany arnaıy portalda ótý qajet jáne jeke derekterdi óńdeýge kelisim berý kerek.

Eger azamat bul tekserýden ótpese, ol kezekte turý quqyǵynan aıyrylmaıdy. Alaıda, bank oǵan ýaqytsha arendalyq turǵyn úıdi bólip bere almaıdy nemese 2% jáne 5% jeńildikti nesıelerin bere almaıdy. Bul shekteýler tekserý aıaqtalǵansha kúshinde qalady.

Buǵan deıin bank ýaqytsha jeńildikter qarastyryp, jańa júıeni iske qosýdy jedeldetý úshin, ınventarızasıadan ótpegenderge de páter bólip bergen bolatyn. Tek keıinnen tekserý júrgizildi.

Nelikten jańa erejeler qajet boldy?

Bank ókilderiniń aıtýynsha, burynǵy tártipte keıbir máseleler týyndaǵan. Mysaly, ınventarızasıa kezinde azamattyń buǵan deıin úı satyp alǵany anyqtalsa, ol kezekke turýǵa quqyǵy joq bolyp shyǵady. Nemese otbasy quramy ózgerip, balalar kóbeıgen jaǵdaıda, buryn berilgen páterdiń aýdany suranysqa sáıkes kelmeı qalýy múmkin. Mundaı jaǵdaılarda barlyq prosesti qaıta bastaýǵa týra kelip, ýaqyt joǵalǵan.

«Otbasy bank» ulttyq damý ınstıtýty retinde turǵyn úımen qamtamasyz etý jumystaryn júrgizedi. Qazirgi tańda oblys ákimdikterinen 13 393 páter berilgen. Onyń 8846-sy arendalyq turǵyn úıge, 4547-si nesıelik turǵyn úıge arnalǵan. Osy ýaqytqa deıin 4216 otbasy jańa baspanaǵa ıe boldy. Al 24 aqpan kúni jaǵdaı boıynsha 257 myń adam ınventarızasıadan ótti.