InfoHub Logo

Astana. 2 naýryz. «Otbasy bank» turǵyn úı jaǵdaıyn jaqsartý maqsatynda biryńǵaı jınaqtalǵan zeınetaqy tólemderin (BJZT) paıdalanýǵa ótinimderdi qabyldaýdy qaıta bastaıdy. Bul týraly bank baspasóz qyzmeti habarlady.

Bank ókilderiniń aıtýynsha, ótinimderdi qabyldaý dúısenbi, 2 naýryzdan bastap qaıta júzege asady.

Esterińizge sala keteıik, qańtar aıynyń sońynda «Otbasy bank» bereshekti ishinara nemese tolyq óteý úshin BJZT paıdalanýǵa ótinimderdi qabyldaýdy ýaqytsha toqtatqany týraly habarlaǵan bolatyn.

Bankte bul qadamdy ózderiniń qashyqtan qoljetimdi qyzmetterin – mobıldi qosymsha men otbasybank.kz portalyndaǵy jeke kabınetti jańa talaptarǵa beıimdeý qajettiligimen túsindirdi. Buǵan deıin turǵyn úı jaǵdaıyn jaqsartý úshin BJZT paıdalaný erejelerinde «bereshek» termıni «negizgi borysh» termınimen aýystyrylǵan.

«Bul degenimiz, endi zeınetaqy qaldyqtary arqyly nesıeni ishinara nemese tolyq merziminen buryn óteý kezinde tek negizgi boryshty óteýge bolady. Buryn «bereshek» termınine sáıkes keletin aı saıynǵy tólemdi tolyq óteý zeınetaqy tólemi esebinen múmkin bolmaıdy. Nesıe boıynsha paıyzdar men aı saıynǵy tólemge kiretin basqa da ilespeli tólemderdi qaryz alýshy óz qarajaty esebinen tóleýi tıis», — dep túsindirdi «Otbasy bank».

Osy jańalyqqa baılanysty «Otbasy banktegi» qaryzdardy ishinara jáne tolyq óteý prosesi qaıta qaralýǵa jatty, bul ótinimderdi qabyldaýdyń ýaqytsha toqtatylýyna sebep boldy.

«Bolashaqta bul operasıa eki bólikten turatyn bolady: aldymen nesıe boıynsha syıaqy jáne basqa da ilespeli tólemder óz qarajaty esebinen tólenedi, sodan keıin negizgi borysh – zeınetaqy qaldyqtary esebinen. Bul úshin «Otbasy banktegi» aǵymdaǵy jáne arnaıy shotta qarajattyń bar ekenin aldyn ala qarastyrý qajet bolady», — dep habarlady uıym.

Buǵan deıin biz 2 naýryzdan bastap «Otbasy bank» kezekte turǵandarǵa turǵyn úı bólý rásimin ózgertetini týraly jazǵan bolatynbyz. Endi bank tek ınventarızasıadan ótkennen keıin ǵana turǵyn úı bóledi.