InfoHub Logo

Atyraýda ata-enesin óltirdi degen kúdikke ilingen Sultan Sársemálıevtiń Indonezıada ustalýy týraly jańalyq álemdi dúrliktirdi. Halyqaralyq izdeýde júrgen kúdikti týrıser kóp baratyn Lombok aralyndaǵy Senarý aýylyndaǵy qonaqúıde qolǵa tústi.

Bul týraly Infohub.kz aqparat agenttigi habarlaıdy.

Interpoldyń "qyzyl búlleteni" jáne sot sanksıasy

Soltústik Lombok polısıasynyń basshysy Agýs Pýrvanta operasıanyń Interpoldyń "qyzyl búlleteni" jáne Atyraý qalalyq sotynyń 2026 jylǵy 8 qańtardaǵy sanksıasy negizinde júrgizilgenin aıtty. Ol jergilikti BAQ-qa bergen suhbatynda: "Interpoldan resmı habarlama túsken kezde istiń mán-jaıymen tanysyp, tańdanysymyzdy jasyrmadyq. Biz úshin eń bastysy – Indonezıanyń halyqaralyq izdeýde júrgen qylmyskerlerge pana bolatyn elge aınalmaýy", – dep málimdedi.

Qashýǵa talpynys jasaǵan kúdikti

Arnaıy operasıa 24 aqpanda ótti. Qylmystyq izdestirý bóliminiń basshysy I.Komang Vılandranyń aıtýynsha, kúdiktiniń Senarý aýylynda júrgeni týraly aqparat túsken soń, jedel top birden áreketke kóshken. Polıseıler qonaqúıge kirgen kezde Sársemálıev qashýǵa talpynǵanymen, kóp uzamaı ustalyp, eshkimge zıan keltirmegen.

Qazaqstan azamattary da ustaldy

Oqıǵa ornynda Sársemálıevpen birge taǵy bir qazaqstandyq, 30 jastaǵy áıel de ustaldy. Buǵan deıin bul áıeldiń qaza tapqan erli-zaıyptynyń qyzy Aqbaıan Muqanǵalıeva ekeni habarlanǵan bolatyn. Tergeýshiler ustalǵandardyń jeke kýálikterin, pasporttaryn, halyqaralyq bank kartalaryn jáne uıaly telefondaryn tárkiledi.

Ekstradısıa máselesi

Jergilikti aqparat quraldarynyń habarlaýynsha, aldaǵy ýaqytta bul azamattardy Qazaqstanǵa ekstradısıalaý máselesi Indonezıa Ádilet mınıstrligimen, ulttyq polısıanyń halyqaralyq ister bólimimen jáne ózge de quzyrly organdarmen birlesip qaralady. Barlyq rásimder ulttyq zańnama men halyqaralyq kelisimder aıasynda júrgiziletin bolady. Qazirgi tańda Sársemálıev Soltústik Lombok polısıa basqarmasynyń ýaqytsha ustaý ızolátorynda qamaýda otyr.