InfoHub Logo

Abylaı han atyndaǵy Qazaq Halyqaralyq qatynastar jáne Álem tilderi ýnıversıtetiniń

Jýrnalısıka mamandyǵynyń

2 kýrs stýdenti Janalı Aıajan

 

Búginde qoǵamda kóterilip jatqan kókeıkesti máselelerdiń bir tolqyny - til týraly bolyp otyr. Osyǵan oraı, memleketimizdi joǵary deńgeıde, Halyqaralyq arenaǵa shyǵarý úshin úshtildilikti engizý - eń negizgi bastamalardyń biri. Úshtildilik búgingi zaman talaby, tynysy. Aǵylshyn, orys tilderin jetik meńgerý - bizdi bıikke shyǵaratyn kúsh. 

Qazirgi tańda úshtildilikke ótý tolyǵymen qolǵa alynyp jatyr. Balabaqshadan, ýnıversıtetke deıin orys tili men aǵylshyn tilin sapaly oqytý júıeleri qalyptasqan. Bul jolda urpaqqa durys bastama men baǵyt-baǵdar kórsetý - bolashaqqa bastar alǵashqy qadam. 

Qazaqstan - 130-dan asa ult ókilderinyń basyn bir shańyraqqa jınaǵan kóp ultty memleket. Shańyraǵy bıik, yntymaǵy men birligi jarasqan memleket bolý úshin, ózgelerge degen syılastyǵymyz ben qurmetimizdi bildirý úshin - orys tilin qoǵamǵa engizý, ony bilý mańyzdy. Al aǵylshyn tili - álemdik til. Bul tildi úırený- bizge ǵajaıyp múmkindikter beredi. Rasymen de, aǵylshyn, orys tilderin meńgerý, tipti biz bilmeıtin dúnıelerdiń jaryq kórýine jol ashýy da múmkin. Alaıda, zaman talabyna ilesip júrip, ózge tildi úırenip, ana tilimizdiń mártebesin túsirip almaımyz ba? Týǵan tilimizdiń umyt qalmaýyna kim kepil? Ana tilimizge degen mahabbatymyz, syı -qurmetimiz qanshalyqty myqty? Júregime ýaıym uıalatqan osy suraqtar tóńireginde kóp oılandym, tolǵandym. Eger anamyzdyń aq sútimen boıymyzǵa  daryǵan tildi qadirlemeı, ózge tildiń eteginen júgirsek, onda bul ulttyq bolmysymyzdy umytqanmen teń. Menińshe, ózge tildi úırený- óz tilimizge degen mahabbat pen qurmetti nyǵaıtýdan bastalý kerek. Sonda ǵana úshtildilikke nyq qadam basamyz.Ulttyq bolmysy men óz jurtyn, tilin, dinin umytqan halyqtyń álemde abyroıly bolýy ekitalaı. Sondyqtan úshtildilikke kóshýdi, tilimizge degen qurmetimizdi arttyrýdan bastaıyq. «Ózge tildiń - bárin bil, óz tilińdi qurmette»,- dep, el bolyp, bir atanyń balalaryndaı óz damýymyzǵa, jarqyn bolashaǵymyzǵa jol ashaıyq. Keleshegimizdi kemel, bolashaǵymyzdy jarqyn etý de, elimizdi álemge pash etý de – óz qolymyzda!

 

---