InfoHub Logo

Ózgeniń temir-tersegine jan bitirgen sheber, óz densaýlyǵyna da sondaı nazar aýdarǵanda ǵoı

Ómir – ótkinshi. Biz ony jaqsy bilemiz, biraq kóbine umytyp ketemiz. Qasymyzda júrgen adamdardyń máńgilik emes ekenin, olardyń árqaısysy bizge ýaqytsha qonaq ekenin keıde sezinbeımiz. Qarapaıym bir kúnde, kútpegen jerde, jaı ǵana syrqat dep oılaǵan nárse – sońǵy sátke aınalýy múmkin.

Jaqynda men úshin asa aýyr jaǵdaı oryn aldy. Kórshim kenetten aýrýhanaǵa túsip, sol jerde jan tásilim etti. Oılamaǵan jerden. Jaı ǵana asqazan aýyrýy dep barǵan adam, júregi toqtap, qaıtyp oralmady. Bul meniń júregimdi aýyrtty. Ol meniń týysym emes edi, baýyrym da emes. Biraq, shyn máninde, jaqyn adamymdaı bolyp ketken jan bolatyn.

Biz birge talaı kúnderdi ótkizdik. Aýylda birge turdyq, birge kólik aldyq. Aq tústi, azyn-aýlaq aqshaǵa satyp alynǵan Jıgýlı ekeýimizdiń ortaq múlkimizdeı edi. Ol meniń kóligimniń buzylǵan jerlerin qarap, jóndep beretin. Men oǵan kóligimdi senip tapsyratynmyn. Barar jerine meniń temir tulparymdy minip ketetin. Onyń qoly altyn edi, aýyldaǵy eń myqty motorıst bolatyn. Buzylǵan kólikke jan bitiretin.

Biraq, átteń, ómirdiń óz zańy bar. Ózgeniń temir-tersegine jan bitirgen sheber, óz densaýlyǵyna da sondaı nazar aýdarǵanda ǵoı... Ókinishtisi, ol óziniń syrqatyna mán bermedi me, álde ómirdiń buıyrǵany sol ma, belgisiz. Ózine em taba almaı, bul ómirden erte ketti.

Kórshimniń qazasy tek men úshin ǵana emes, búkil aýyl úshin aýyr tıdi. Óıtkeni ol tek motorıst emes edi. Ol – adamdarǵa janashyr, qolynan kelgenshe kómektesetin, adal azamat bolatyn. Oǵan kóligińdi, tipti, bir sharýańdy senip tapsyrýǵa bolatyn. Júreginde zulymdyq joq, shynaıy adam edi.

Al endi ony izdeıtinder kóp, biraq ornyn basatyn jan joq. Aýylda kimniń kóligi buzylsa,birinshi bolyp kórshimniń úıine kelýshi edi.Esik aldy tolǵan kólik,kúndelikti kemi bir kólik bolsyn úzilmeıtin.

Onyń joqtyǵy seziledi. Aýyl da burynǵydaı emes. Bir nárse jetispeıdi... Bir adam jetispeıdi.

Ómirdiń qataldyǵy – keıbir nárselerdi kesh túsinetindigimizde. Biz bireýdiń tirshiligine úırenip ketemiz. Olar árdaıym janyńda júretindeı kórinedi. Biraq, shyn máninde, ár kezdesýdiń, ár amandasýdyń, ár sózdiń quny bar. Keıde sońǵy ret kórgenimizdi bilmeımiz.

Qasymyzdaǵy adamdardy barynda qadirleıik. Olardyń eńbegin, jaqsylyǵyn, adaldyǵyn kózi tirisinde baǵalaıyq. "Keshe ǵana amandasyp edik..." dep ókinbeý úshin, alǵysymyzdy aıtýǵa, jaqsylyq jasaýǵa asyǵaıyq. Sebebi erteń bári kesh bolýy múmkin...