InfoHub Logo

Baıan Alagózova Jubanysh Jeksenulyna qatysty daýǵa pikir bildirdi: «Ártister de adam»

Tanymal prodúser Baıan Alagózova ánshi Jubanysh Jeksenulyna qatysty oryn alǵan oqıǵaǵa baılanysty óz ustanymyn bildirdi. Ol Instagram paraqshasynda belgili adamdardyń jeke keńistiginiń jıi buzylatynyna alańdaýshylyq tanytyp, kópshilikti etıka men mádenıetke shaqyrdy.

«Men barlyq ártisterdiń atynan aıtqym keledi: bireý meıramhanada, vokzalda nemese áýejaıda tynyǵyp otyrsa, ony ruqsatsyz vıdeoǵa túsirip jatady. Bul — jeke keńistikke qol suǵý. Ártister de qarapaıym adam. Olar da sharshaıdy, renjıdi, oıǵa shomyp otyrýy múmkin. Osyndaı sátte bireýdiń únsiz kamera qosýy — kez kelgen adamnyń shamyna tıýi ábden múmkin», — dedi Alagózova.

Prodúser Jubanysh Jeksenulyna qoldaý bildirip, mundaı jaǵdaıda kináni bir tarapqa ǵana artýdyń orynsyz ekenin atap ótti.

«Biz Jubanyshtyń ol sátte qandaı kúıde bolǵanyn bilmeımiz. Bálkim, álgi adam kelip, ruqsat suramastan kamerasyn qosyp, 'selfı jasaıyq' degen shyǵar. Eshkim jaıdan-jaı ashýǵa minbeıdi. Sondyqtan mundaı oqıǵada eki tarap ta jaýapkershilikti bólisýi kerek dep esepteımin», — dedi ol.

Alagózova áleýmettik jelide bireýdiń sátsizdigine qýanyp, aıaqasty etetin áreketti de synǵa aldy.

«Tanymal adam qandaı da bir qıyndyqqa tap bolsa, kópshilik sol adamnyń janyn túsinýge tyryspaı, syrttaı sheshim shyǵaryp, jamandaı bastaıdy. Olar ony tipti tanymasa da, synaýǵa daıyn turady. Bireýdi 'taıaq jeýge yńǵaıly' dep taýyp alady da, toqtamaı ústinen júredi. Men Jubanyshqa kúsh-qaırat tileımin», — dep jazbasyn túıindedi prodúser.

Eske salaıyq, buǵan deıin Jubanysh Jeksenulyna usaq buzaqylyq boıynsha aıyp taǵylyp, 78 640 teńge kóleminde aıyppul salynǵany habarlanǵan bolatyn.