InfoHub Logo

Perızat Qaırat 10 jylǵa sottaldy: Qaıyrymdylyq qarjysyn jymqyrý isi boıynsha úkim shyqty,-dep jazady Infohab tilshisi.

ASTANA. 25 shilde. Astananyń qylmystyq ister jónindegi aýdanaralyq arnaýly soty qoǵamda keń rezonans týdyrǵan «Biz Birgemiz Qazaqstan» qaıyrymdylyq qorynyń burynǵy jetekshisi Perızat Qaırat pen onyń anasy Ǵaını Alashbaevaǵa qatysty úkim shyǵardy.

Perızat Qaırat 10 jylǵa, al onyń anasy Ǵaını Alashbaeva 7 jylǵa bas bostandyǵynan aıyryldy. Sonymen qatar, ekeýi 50 jábirlenýshige jalpy 1,5 mlrd teńge ótemaqy tóleýge mindetteldi.

Sot olardy qaıyrymdylyqqa dep jınalǵan 3,5 mıllıard teńgeden astam qarjyny jymqyrdy dep tanydy. Bul – el tarıhyndaǵy eń aýqymdy qaıyrymdylyq qarjysyn teris maqsatta paıdalaný faktileriniń biri.

Qylmystyq sqema qalaı jumys istedi?

2024 jyldyń kókteminde el aýmaǵynda bolǵan tasqynnan keıin Perızat Qaırat bastaǵan uıym gýmanıtarlyq kómek jınap, halyqtyń senimine ıe bolǵan edi. Biraq qarasha aıynda Perızat Qaırat qamaýǵa alynyp, oǵan tasqynnan zardap shekkenderge arnalǵan 1,5 mlrd teńgeni jymqyrdy degen alǵashqy aıyp taǵyldy.

Tergeý barysynda belgili bolǵandaı, ol aqshaǵa Astanadaǵy elıtalyq turǵyn úı keshenderinen birneshe páter, qymbat kólikter – Mercedes-Benz S450, Lexus LX-600, Haval H6 GT jáne Mercedes-EQE 500 4Matic, sondaı-aq sán-saltanatty buıymdar satyp alynǵan.

Keıinnen Qaıratqa Palestına halqyna kómekke dep jınalǵan 200 mıllıon teńgeni jymqyrdy degen qosymsha aıyp taǵyldy. Bul qarjynyń bir bóligi "Rebel Flowers" atty gúl dúkenin satyp alý arqyly zańdastyrylǵany anyqtaldy.

Prokýrordyń sózinshe, aıyptalýshylar jymqyrǵan aqshanyń bir bóligin úshinshi tulǵalarǵa, týystaryna rásimdep, zańdastyrý áreketin de jasaǵan.

Sot prosesi 2025 jyldyń 9 shildesinde bastalyp, birneshe aptaǵa sozyldy. Aıypkerler – 34 jastaǵy Perızat Qaırat pen 62 jastaǵy anasy ózderine taǵylǵan aıyptardy tolyqtaı moıyndaǵan joq.

Perızat Qaırat sotta sóılegen sózinde:

"Bul keltirgenderi negizsiz dep esepteımin. Tergeýshilerdiń qıaly úshin men jaýapty emespin. Bolashaqta naqty dáleldermen ózimdi qorǵaımyn," – dedi.

Onyń advokattary istiń kóptegen tustaryn ashyq qaraýǵa qarsy bolyp, aıyptalýshylardyń sotta jaýap bergen bóligi jabyq túrde tyńdaldy. Sýdıa Sabyrjan Kárimov bul sheshimdi jeke tulǵalardyń jeke málimetteri qaralyp jatqanymen túsindirdi.

Sondaı-aq úkim jarıalanǵan kúni de jýrnalıser sot zalyna kirgizilmeı, bólek bólmedegi monıtordan baqylaýǵa májbúr boldy. Al sońǵy sózderin aıtýǵa arnalǵan otyrysqa BAQ ókilderi múlde qatystyrylǵan joq.

Qamaýdaǵy qysym týraly shaǵym jáne tekserý

Sotqa deıingi tergeý kezinde Perızat Qaırat ózin tergeý ızolátorynda qysym kórdi dep málimdegen. Onyń aıtýynsha, mekeme qyzmetkeri kameranyń esigin kúshtep jaýyp, ony esikke qysyp, jaraqat salǵan.

Bul shaǵym prokýratýraǵa joldanyp, Astana qalasy polısıa departamenti sotqa deıingi tergeý amaldaryn júrgizdi. Degenmen beınebaqylaý jazbalaryn qarap, kýágerlerden jaýap alǵan tergeýshiler Qaırattyń málimdemesi rastalmaǵanyn málimdedi.

Perızat Qaıratqa qatysty tergeý men sot prosesi qoǵamda úlken rezonans týdyrdy. Qaıyrymdylyq ataýyn jamylyp, alaıaqtyq jasaý — jurtshylyqtyń senimine zor soqqy boldy. Osy oqıǵa aıasynda Qazaqstan bıligi "Qaıyrymdylyq qyzmet týraly" zańǵa ózgerister engizýdi usyndy.

Usynylyp otyrǵan túzetýlerge:

• Qaıyrymdylyq qorlaryn akredıtasıadan ótkizý;
• Tótenshe jaǵdaı kezinde tek ákimdik belgilegen uıymdarǵa ǵana qarajat jınaýǵa ruqsat berý;
• Ruqsatsyz qarajat jınaǵan jeke tulǵalarǵa aıyppul salý syndy normalar kiredi.

Perızat Qaırat isi — tek sot prosesi ǵana emes, memlekettik senim men qaıyrymdylyq júıesiniń bolashaǵyna qatysty mańyzdy másele. Bul úkimmen birge bılikke de, qoǵamǵa da úlken sabaq berildi: qaıyrymdylyq jeleýimen júrgiziletin kez kelgen áreket endi qatań baqylaýǵa alynbaq.