InfoHub Logo

Petropavlda 66 jastaǵy zeınetker as ishý kezinde jylqy etindegi ótkir súıekti baıqamaı jutyp qoıyp, ómirine qater tóndirgen. Jedel túrde aýrýhanaǵa jetkizilgen er adamǵa dárigerler shuǵyl ota jasap, ajal aýzynan aman alyp qaldy.

Bul týraly Infohub.kz aqparat agenttigi habarlaıdy.

Naýqas keshki as kezinde jylqy etin jep otyryp, súıekti jutyp alǵanyn aıtqan. Alǵashynda ózinen-ózi ótip ketedi dep oılaǵanymen, keıinnen keýde tusy men moıny qatty aýyryp, júreni aınyǵan. Ýaqyt ozdyrmaı jedel medısınalyq járdemge júgingen.

Óńeshtiń tesilý qaýpi bolǵan

Kópbeıindi qalalyq aýrýhanaǵa jetkizilgen naýqasty teksergende, súıektiń óńeshtiń shyryshty qabyǵyna eki jaǵynan kirip ketkeni anyqtaldy. Bul jaǵdaı óte qaýipti bolǵandyqtan, dárigerler dereý operasıalyq bólmege kirisip, jalpy narkozben kúrdeli ota jasady. Hırýrg-endoskopıst Konstantın Zyránovtyń basshylyǵymen súıek sátti alynyp, naýqastyń ómiri qutqaryldy.

Mamandar eskertedi

Medısına mamandary mundaı jaǵdaılardyń óte qaýipti ekenin aıtady. Bir qate qımyl óńeshtiń jyrtylýyna nemese qan ketýge ákelýi múmkin. Eger naýqas der kezinde medısınalyq kómekke júginbese, óńeshtiń tesilýi, aýyr ınfeksıa nemese sepsıs sıaqty asqynýlarǵa ushyraýy yqtımal edi.

Qazirgi tańda Petropavl turǵyny hırýrgıa bóliminde em qabyldap, jaǵdaıy ortasha aýyrlyqta, turaqty dep baǵalanýda. Dárigerlerdiń baqylaýynda qalpyna kelý kezeńin jalǵastyrýda.

Mamandar halyqqa tamaqty asyqpaı, muqıat shaınap jeýge keńes beredi. Ásirese, súıegi bar taǵamdardy tutynǵanda erekshe saq bolý qajet. Keýde nemese moıyn tusynda qatty aýyrsyný sezilse nemese tamaqta bógde zat turǵandaı áser paıda bolsa, dereý dárigerge qaralý mańyzdy.