InfoHub Logo

Qazaqstandaǵy qylmystyq-atqarý júıesinde jańa ózgerister kútilýde. Memleket basshysy Qasym-Jomart Toqaev kámeletke tolmaǵan balasy bar áıelderdiń túrmedegi jaǵdaıyn qaıta qarastyryp, olarǵa jeńildikter qarastyrý qajettigin málimdedi.

Prezıdentke belgili advokat Aıman Omarova arnaıy hat joldap, áıelder kolonıalaryndaǵy ahýal týraly baıandaǵan. Hatta ásirese júkti áıelder men balasy bar sottalýshylardyń jaǵdaıyna erekshe nazar aýdarylǵan.

"Elimizdegi qylmystyq-atqarý júıesiniń maqsaty – tek jazalaý emes, túzetý bolýy kerek. Er adam bolsyn, áıel bolsyn, zań aldynda bári teń ekeni túsinikti. Alaıda adamgershilik qaǵıdalaryn ustana otyryp, kámeletke tolmaǵan balasy bar áıelderge qatysty keıbir zańdyq ustanymdardy qaıta qaraýǵa bolady dep esepteımin", – dedi Prezıdent.

Qazirgi tańda Qazaqstandaǵy túrmelerde kámeletke tolmaǵan balalary bar júzdegen áıel jazasyn ótep jatyr. Zań boıynsha, mundaı sottalýshylarǵa arnaıy jeńildikter qarastyrylǵanymen, olardyń ómir súrý jaǵdaılary áli de qıyn.

Prezıdent bul máseleni Quqyq qorǵaý organdary men Parlament depýtattary jan-jaqty zerttep, zańnamalyq ózgerister boıynsha naqty usynystar engizýi kerek ekenin aıtty.

Mundaı qadam áıelderdiń balasynan uzaq ýaqyt ajyrap qalmaýyna múmkindik berip,qaıta áleýmettený úderisin jeńildetedi.

Buǵan deıin de Qazaqstanda áıelder men balalarǵa qatysty jazany jeńildetý máseleleri kóterilgen bolatyn. Biraq bul joly ózgerister zańnamalyq deńgeıde bekitilýi múmkin.

Qoǵamda bul bastamaǵa baılanysty túrli pikirler bar. Keıbir sarapshylar mundaı reforma qajet ekenin alǵa tartady, sebebi bala úshin eń mańyzdysy – anasymen birge bolýy. Sonymen qatar, jazasyn ótep jatqan áıel túrmeden shyqqan soń, qoǵamǵa qaıta beıimdelý múmkindigine ıe bolady.

Alaıda, keıbir synshylar "zań barlyǵyna ortaq bolýy kerek" degen ustanymda. Olar balasy bar áıelderge qatysty jazany jeńildetý ádiletsiz bolýy múmkin dep esepteıdi.

Degenmen, halyqaralyq tájirıbege súıensek, kóptegen elderde áıelder men balalardyń quqyqtaryn qorǵaýǵa erekshe kóńil bólinedi. Mysaly, Skandınavıa elderinde mundaı áıelder túrme ornyna arnaıy áleýmettik ortalyqtarda jazasyn óteıdi.

Prezıdenttiń bul bastamasy Qazaqstandaǵy qylmystyq-atqarý júıesin gýmanızasıalaýǵa baǵyttalǵan mańyzdy qadam bolýy múmkin. Eger zańnamalyq ózgerister engizilse, áıelder men balalardyń quqyqtary qorǵaýǵa alynyp, áleýmettik ádilettilik ornaıdy. Al bul ózgeristiń qoǵamǵa qanshalyqty tıimdi bolatynyn ýaqyt kórsetedi.