InfoHub Logo

Blogerler Erbolat Janabylov pen Elmıra Tólegenovaǵa qatysty sot prosesi máresine jaqyndap qaldy. Juma kúni, 24 sáýirde, sottalýshylar sońǵy sózderin aıtýy tıis bolatyn. Alaıda, Elmıra Tólegenova densaýlyǵyna baılanysty sotqa kelmegendikten, proses keıinge shegerildi.

Bul týraly Infohub.kz aqparat agenttigi habarlaıdy.

Buǵan deıin sotta memlekettik aıyptaýshy Oljas Haırýllaev Elmıra Tólegenovaǵa bir jylǵa merzimimen keıinge qaldyrý shartymen 4 jyl bas bostandyǵynan aıyrýdy suraǵan edi. Qylmystyq kodekstiń 74-babyna sáıkes, 14 jasqa tolmaǵan balalary bar áıelderge jazany oryndaýdy bes jylǵa deıin keıinge qaldyrýǵa bolady. Prokýrordyń aıtýynsha, Tólegenovanyń úsh jas balasy bar ekeni eskerilgen, biraq merzimdi bir jylǵa ǵana keıinge qaldyrý usynyldy.

Janabylovtarǵa nemen aıyp taǵyldy?

Tanymal blogerlerge Qylmystyq kodekstiń 214-babynyń 2-bóligi, 2-tarmaǵy («Zańsyz kásipkerlik») jáne 218-babynyń 2-bóligi, 1-tarmaǵy («Qylmystyq jolmen alynǵan aqshany nemese ózge de múlikti zańdastyrý (jylystatý)») boıynsha aıyptar taǵyldy. Tergeý málimetteri boıynsha, blogerlerdiń jobalaryna baılanysty shottarǵa 247 mıllıon 653 myń teńge túsken.

Sot prosesiniń barysy

Astanada Erbolat Janabylov pen Elmıra Tólegenovanyń isi boıynsha sot otyrysy 16 naýryzda bastaldy. Erbolat Janabylov sotta jylap, ishinara kinásin moıyndaǵan bolatyn. Elmıra Tólegenova da sotta óz kinásin ishinara moıyndady. Sot prosesinde prokýror eki aıyptalýshyny da barlyq taǵylǵan baptar boıynsha kináli dep tanyp, olarǵa mınımaldy qaýipsizdik mekemesinde 4 jyldan bas bostandyǵynan aıyrý jazasyn taǵaıyndaýdy surady.