InfoHub Logo

Kóp qyzdardyń armanyna aınalǵan bortserik mamandyǵy syrt kózge tolassyz saıahat pen sulýlyqqa toly bolyp kórinýi múmkin. Alaıda bul joldyń óz qıyndyǵy men úlken jaýapkershiligi bar. Álemdegi eń úzdik áýe kompanıalarynyń biri Fly Emirates-ke jumysqa ornalasqan qazaq qyzy Aqjan Turarovamen suhbattastyq.

Bul týraly Infohub.kz aqparat agenttigi habarlaıdy.

«Air Astana» – kásibı mektep

Aqjannyń avıasıadaǵy joly otandyq «Air Astana» kompanıasynda bastaldy. Onda jumys istegen úsh jylyn jeke tulǵa retinde qalyptastyrǵan, kásibı shyńdaǵan mektep boldy dep esepteıdi.

«Bul jumys arqyly kásibı daǵdylarym damydy, álemdi tanydym. Úsh jyl ishinde jańa mádenıetpen tanysyp, jańa dostar taptym. «Air Astana»-daǵy jumysymdy árdaıym qýanyshpen eske alamyn», – deıdi Aqjan.

Emirates-ten shaqyrtý

Álemdik deńgeıdegi alyp kompanıadan usynys túskende, Aqjan ári qýanǵanyn, ári tańǵalǵanyn da aıtady. Sebebi Fly Emirates – óz salasynyń shyńy. Biraq sheshim qabyldaý ońaı bolmaǵan. Jańa ortaǵa beıimdelý, úırenshikti komfort aımaǵynan shyǵý jáne jaýapkershiliktiń artýy úlken batyldyqty talap etti. Sol kezdegi kúmán men qorqynyshty jeńe bilgen Aqjan bolashaǵy úshin durys tańdaý jasadym deıdi.

İrikteý kezeńi: tek myqtylarǵa oryn bar

Fly Emirates-tiń irikteý talaptary óte qatal ári joǵary ekeni belgili. Aqjannyń aıtýynsha, kompanıa árbir úmitkerden kásibı biliktilikten bólek, temirdeı tózim men psıhologıalyq daıyndyqty talap etedi.

«İrikteý prosesi birneshe kúrdeli kezeńnen turdy. Aldymen onlaın ótinim toltyrylyp, odan ótkender kastıngke shaqyryldy. Kastıng barysynda úmitkerler toptyq synaqtardan ótip, arnaıy tester tapsyrdy jáne betpe-bet suhbattarda ózderiniń qabiletterin dáleldedi», – deıdi Aqjan.

Prosesterdiń barlyǵy aǵylshyn tilinde ǵana júrgizilgendikten, tildi erkin meńgerý eń basty sharttardyń biri bolǵan. Aqjan bul synnan múdirmeı ótý úshin kóp izdenip, osy salada júrgen dos qyzdarynyń tájirıbesine súıenip, jan-jaqty daıyndalady. Búginde ol osy kompanıada ózi sekildi qazaq qyzdarynyń kóptigin kórip, olardyń bilimi men talpynysyna maqtanyshpen qaraıdy.

Mamandyqtyń kóleńkeli tustary

Stúardessa mamandyǵy syrttaı qaraǵanda qanshalyqty ádemi kóringenimen, onyń kóleńkeli tustary men aýyr júgi de az emes. Aqjan bul salanyń qıyndyǵyn da ashyq aıtady. Uıqysyz túnder, turaqsyz rejım, fızıkalyq jáne mentaldy sharshaý. Mereke kúnderi jaqyndaryńnyń janynda bola almaısyń. Kez kelgen jaǵdaıda, tipti kóńil-kúıiń bolmasa da, jolaýshylarǵa meıirimmen kúlimsirep qaraý da úlken erik-jigerdi talap etedi.

«Densaýlyqqa da úlken áser etedi, sondyqtan únemi dárýmender qabyldap, ózińdi kútýiń kerek. Bul joldy tek aspandy shyn júrekpen súıetin adam ǵana tańdaı alady», – dep túıindedi ol.

Dese de, kókte ushqandy shyn súıetin jan úshin bul kedergilerdiń bári ekinshi orynǵa ysyrylady. Aqjannyń aıtýynsha, sheteldik áýe kompanıasynda jumys isteý – álemdi tanýdyń, túrli mádenıet ókilderimen til tabysýdyń jáne ómirlik bilim jınaýdyń zor múmkindigi. Ol armany asqaq qyzdarǵa tek áreket etýdi, aǵylshyn tilin toqtaýsyz damytýdy jáne ózine degen senimdilikti joǵaltpaýdy keńes beredi. Sebebi maqsatqa degen adaldyq pen qajyrly eńbek qana adamdy bıik shyńdarǵa, tipti álemdik deńgeıdegi kompanıalardyń borttaryna jeteleıdi.