InfoHub Logo

Bir kúni kórshiniń úıinen kelgen apamyz úıge kúrsine kirip, atamyzǵa: «Ábden bekip alypty, ketkeli jatyr!», dedi. Atam biraz otyrdy da asyqpaı qozǵaldy. Kórshi úıge tartty. Apam ún-túnsiz qala berdi. Biz balamyz, atamnyń izinshe álgi úıge entigip kirdim. Kórshiniń áıeli jylap júr. Kıimderin jınap júr. Eki balasyn kıindirip qoıypty. Atam kirip barǵanda sálem salǵan kelinshek:

«Ata, aıtpaı-aq qoıyńyz, nege kelgenińizdi túsindim. Men endi tóze almaımyn. Boldy, qansha shydadym. Ózderińiz kórip-bilip otyrsyzdar, endi meni tospańyzdar! Ketem dedim, ketem!», dep sýmkasynyń aýzyn sydyryp jatyr. Sonda atam:

«E-e-e qaraǵym, jón, jón…» dep biraz otyrdy da kelinshekke:

«Qaraǵym, sen osy úıge kelgende nesheý ediń?», dep saýal qoıdy. Kelinshek jaýap bergisi kelmese de, atamnan ımenip:

«Bir ózim…», dedi.

«Endeshe, qalaı kelseń, solaı ketesiń. Andaǵy ekeýin sheshindir, rýy bólek ózge áýletke jáýteńdetpe! Munda da el bar, ashtan ólmeıdi, kóshten qalmaıdy. Óz jurtynyń ishinde óssin. Ata dástúr solaı», dep sózin salmaqtap aıaqtady. Sonda ne boldy deısizder ǵoı, kelinshek ókirip jylap, eki balasyn bas saldy.

«Men bulardy tastap qaıda ketem, ata! Bular meniń qolqa-júregim ǵoı!..», dep kıimderin kıip tompıyp turǵan eki balasyn qushaqtap otyra ketti. Jylap otyryp eki balasyn sheshindire bastady. Atam:

«Allah razy bolsyn aınalaıyn, Jaratqan jarylqaıdy seni», dep betin sıpady da, shyǵyp júre berdi… Keıinnen bir otyrysta qazir áje bolǵan sol kelinshektiń esine sol oqıǵany túsirdim. Áldeqashan dúnıeden ótip ketken atama rızashylyq aıtyp,

«Sol eki balany qushaqtap otyrǵan qalpymda qalyp qoıdym ǵoı, mine sodan áli otyrmyn» dep basyn shaıqap-shaıqap qoıyp máz bop kúledi. Qaıda, bul kúnde eki baladan keıin taǵy tórt bala taýyp, otbasy ordaǵa aınalyp, úlken áýlet bolǵan...

---