InfoHub Logo

Qaıbir jyly Nık degen ımıgrant jigittiń oqıǵasy jaıly oqydym. Ol kóptiń biri bop jan baǵý úshin Amerıkaǵa kelgen edi. Biraq ne aqshasy joq, ne aǵylshynsha bilmeıtin.

Ol Nú-Iorktegi ıtalán meıramhanalarynyń birine ydys jýýshy bop ornalasqysy keldi. Biraq bastyqqa kirerden buryn meıramhana ájethanasyna baryp, ony muntazdaı etip qoıdy. Sosyn tis shetkasyn alyp, kafel taqtaıshalardyń arasyndaǵy qýystardyń bárin tazalap shyqty. Ájethananyń ishi jarqyrap shyǵa keldi. Belgilengen ýaqytta Nık meıramhana basshysynyń aldyna keldi. Bastyqtyń júzinen bir tańdanysty baıqady. Ol «Ájethanamyzǵa áp-sátte ne bolǵan ózi?», — dep túsinbeı otyrǵan edi. Eshteńe aıtpaı-aq Nık óz isimen bastyǵyna «Men ydys-aıaqty da týra osylaı jýamyn» degendeı boldy.

Sóıtip Nık jumysqa qabyldandy. Bir aptadan keıin kókónisterdi týraıtyn kisi jumystan shyǵyp, onyń ornyn Nık basty. Osylaısha ol bas aspaz bolý jolyndaǵy alǵashqy qadamyn jasaǵan edi.

«Qazirgi kezde jumys tabý qıyn!» degendi estigende, Nıktiń oqıǵasy eriksiz eske túsedi. Nıktiń yntasyndaı yntamen jumys izdeýge kirisseń, aldyńnan myńdaǵan jumystyń kútip turǵanyn baıqar ediń. Iá, dál qazir dál seniń qalańda. Al Nık qazir mıllıarder. Al áldekimder Nıktiń jaı ǵana joly boldy dep oılap júrgen shyǵar.

---