InfoHub Logo

Baıdyń jylqysyn baǵyp, sharýasyn kúıttegen jalshy jigit baıdyń jalǵyz qyzyna ǵashyq bolypty. Qyz kóńili jigitte bolǵanymen, jalshyǵa tıýine qyzdyń aǵaıyn-týystary yrzashylyq bermeıdi.

Kúnderdiń kúninde qyzdan jigitke habar keledi. «Ákem meni súımegen adamyma atastyryp, jaqynda toıymdy jasap uzatqaly jatyr. Eger ýádeńnen taımaǵan bolsań, ebin taýyp, meni alyp qash», — depti. Ne qylaryn bilmeı, aqyly alpys bólingen jigit aýyldyń bedeldi aqsaqalymen aqyldasyp, jón-joba surapty. Jigittiń sózin túgel tyńdap bolyp, aqsaqal jaýap qatady:

— Shyraǵym, talabyń ońǵarylsyn! Biraq biz ol baıdyń qyzyn baılyqpen ala almaımyz — dáýletimiz jetpeıdi. Batyrlyqpen de ala almaımyz — kúshimiz jetpeıdi. Tek, asqan aqyl-aıla jumsap qana ala alamyz depti. Sonda jigit:

— Aqsaqal, ol qandaı aıla? — desedi.

— Baıdyń Qarajorǵa degen ataqty jorǵasy bar. Eger sol jorǵany qapysyn taýyp qolǵa túsire alsaq, jorǵanyń ózi de keledi, ózine qosa qyzdy da ákeledi. Qyz óz erkimen kelgen bolady. Biz sonda ǵana bar jalasynan aýlaq bolamyz, — deıdi.

— Maqul, aqsaqal. Aıtqanyńyzǵa kóndim. Biraq sol Qarajorǵany qolǵa túsirýdiń jolyn aıtyńyz. «Er serigi — táýekel», kóreıin beldi baılap, — deıdi jigit.

— Olaı bolsa, qalyńdyǵyńa habar aıt. Uzamaı baratyndyǵyń jóninen bir aýyz ısharat bildir. Biraq ol sen barǵan kúnnen bastap tósek tartyp jatyp qalsyn. Naýqas adamnyń keıpinde bolsyn. Jaǵdaıyn suraǵan jeńgesine jaýap bermeı, tek sheshesine tildesip, bir aýyz tilek aıtsyn: «Men jat jurtqa keterimdi bilip, qusa bolyp jatyrmyn. Ákeme aıt, keterimnen buryn týǵan-týys aralap, qatar-qurbymmen kóńil kóterip qalǵym keledi. Maǵan, minýge Qarajorǵasyn bersin», — desin. Jáne bul áńgimeni sheshesi aýyldyń qadirli degen adamyna aıtqyzsyn. Áıtpese, baı kónbes. Qarajorǵa áıel túgili, er adamnyń da taqymyna berilmeıtin qasıetti janýar edi, — dep qaýip aıtady. — Al Qarajorǵa taqymǵa tıgesin qyz attyń basyn birden aýylǵa burmasyn. Áýeli attyń tabanyn qyzdyryp, ábden býsandyrsyn. Óziń ilgeri júre ber de, aqyryn kút. Qalǵany taǵdyr-talaıyńnan belgili bolar, — degen eken.

Jigit aqsaqaldyń aıtqan aqyl-keńesterin túgel oryndaıdy. Qyzdyń sheshesi de ákesin kóndirip, aqyry Qarajorǵa qyz taqymyna tıedi. Ári-beriden soń tabany qyzyp, baýyryn jazǵan Qarajorǵa mańdaıyn Tasqudyqqa berip, baǵyt alyp jónep otyrady.

Jolshybaı jigit qalyńdyǵyn tosyp alyp, elge súıinshige shabarman jiberedi. Jigittiń tileýin tilep, jolyn tosyp turǵan el-jurt alystan ala shańnyń ishinen qaraýytyp erekshe kózge túsken Qarajorǵa aqyry baı qyzynyń enshisi, dúnıesiniń basy bolyp, kelgen jerine sińisken eken desedi.

---