InfoHub Logo

Atyraý oblysyndaǵy Qarabalınder otbasynyń qazasyna qatysty is boıynsha sotta marqum Maqsot Qarabalınniń jıeni Farızat Kenjeǵalıeva jaýap berdi. Ol tergeý kezinde anyqtalmaǵan, ózinde kúmán týdyrǵan birneshe jaıtty sotqa jetkizdi.

Bul týraly Infohub.kz aqparat agenttigi habarlaıdy.

Úıge ekinshi kilttiń paıda bolýy

Farızat Kenjeǵalıevanyń aıtýynsha, tergeý aıaqtalǵan soń marqumdardyń úıiniń kilti ózine berilgen. Ol úıge kúndelikti baryp, jaǵdaıyn baqylap otyrǵan. Alaıda bir kúni úıden buryn-sońdy kezdespegen ekinshi kilttiń tabylýy onyń kúdigin kúsheıtip, istiń mán-jaıyn tereńirek zertteýge ıtermelegen.

«Tergeý aıaqtalǵan soń kiltti maǵan tapsyrdy. Men kún saıyn sol úıge baryp júrdim. Bir kúni tústen keıin ekinshi kilt paıda boldy. Ony kim ákeldi? Buryn ondaı kilt múlde bolmaǵan. Barlyǵy bir ǵana kiltpen kirip-shyǵatyn. Polıseılerdiń ózi alǵashynda úıge esikti buzyp kirip, kiltti ishinen tapqan edi», – dedi kýáger sotta.

Qonaq kútýge daıyndyq belgileri

Kýágerdiń sózinshe, qaıǵyly jaǵdaı bolǵan úıde qonaq kútýge daıyndyq júrgizilgendeı áser qaldyrǵan. Sebebi marqum Naýryz Muqanǵalıev týystaryna kúıeýbalasynyń otbasymen birge qonaqqa keletinin habarlaǵan.

«Aǵam mal soıyp, et daıyndap qoıǵan. Qonaq kútýge qamdanǵan. Osyndaı jaǵdaıǵa qalaı barǵanyn áli kúnge deıin túsine almaımyn», – dedi ol.

Úıdiń tazalyǵy men rettiligi

Farızat Kenjeǵalıevanyń aıtýynsha, otbasy joǵalǵannan keıin úıdiń ishi erekshe tazalyǵymen kózge túsken.

«Úıge kirgende bári ret-retimen turǵanyn kórdik. Úı ıeleri az ǵana ýaqytqa shyǵyp ketkendeı áser qaldyrdy. Barlyq ydys jýylǵan, úı jınalǵan. Soıylǵan ettiń bir bóligi tońazytqyshqa salynyp qoıylǵan», – dedi Farızat Kenjeǵalıeva.

Telefon arqyly aldaý áreketi

Sonymen qatar, kýáger Sultan Sársemálıevtiń marqum Naýryzdyń telefonyn paıdalanyp, týystarymen hat-habar almasqan bolýy múmkin ekenin aıtty. Onyń pikirinshe, bul áreket arqyly jaqyndarynyń kúdigin seıiltip, olardy adastyrýǵa tyrysqan.

«Men alǵashqy kúnnen bastap aǵamnyń úıinde boldym. Aǵam men jeńgemniń máıiti tabylǵan kezde de sol jerde júrdim», – dedi kýáger.