InfoHub Logo

Atyraý oblysynda bolǵan otbasylyq tragedıaǵa qatysty sot otyrysynda marqumdardyń týystary kúdikti Sultan Sársemálıevtiń áreketterine qatysty buryn estilmegen derekterdi aıtyp berdi. Olar marqumdardyń atynan basqa bireýmen hat jazysyp otyrǵandaryn qalaı birtindep túsingenderin baıandady.

Bul týraly Infohub.kz aqparat agenttigi habarlaıdy.

Sotta Jangeldın aýylyndaǵy otbasynyń ólimine qatysty is boıynsha kýágerlerden jaýap alý jalǵasty. Marqum Maqsot Qarabalınniń nemere qaryndasy Parızat Kenjeǵalıeva ótken jyldyń 12 qarashasynda aǵasynyń maly men múlki satylyp jatqanyn estip, onyń úıine barǵanyn aıtty. Sol jerde ol maldy tıep jatqan adamdardy kórip, satylymdy toqtatýǵa tyrysqan.

Onyń sózinshe, bul jaǵdaı týraly ol Naýryz Muqanǵalıevtiń WhatsApp nómiri arqyly bilgen. Áıel sol kezde habarlamalardy basqa bireý jazýy múmkin dep kúdiktenbegen. Kýáger úı ıeleri joq kezde múliktiń satylýyna úzildi-kesildi qarsy bolǵanyn aıtyp, Naýryzǵa birneshe ret vıdeoqońyraý shalýǵa tyrysqanymen, eshkim jaýap bermegen.

Jaýap alý kezinde Kenjeǵalıeva aıyptalýshynyń áreketine emosıasyn jasyra almady. «Ol ólgen adamdy tiriltkendeı áreket jasaǵan», – dedi ol.

Keıin ol Sultan Sársemálıevke qarap: «Olardyń kinási ne edi? Basyńdy kóter!» – dep ún qatty. Sýdıa eskertý jasaǵannan keıin kýáger jaýabyn jalǵastyrdy. Onyń aıtýynsha, marqumdardyń otbasynda qaryz bolmaǵan, olar óz eńbegimen kún kórgen. Bul sózderdi aıtqan kezde áıel jylap jiberdi.

Odan keıin marqum Maqsot Qarabalınniń nemere inisi Shalqar Muqanǵalıevten jaýap alyndy. Ol týystary joǵalǵannan keıin Naýryz Muqanǵalıevpen birneshe ret baılanysýǵa tyrysqanyn aıtty. Habarlamalardyń birine «qıyndyqtar bolyp jatyr, anam aýyryp qaldy» degen mazmunda jaýap kelgen.

Keıin Maqsot Qarabalın men onyń jubaıy Násip Óteshqalıeva iz-túzsiz joǵalǵandar qatarynda bolǵan kezde, Shalqar WhatsApp arqyly Naýryzǵa taǵy da hat jazyp, ne bolǵanyn túsingisi kelgen. Alaıda bul joly jaýap bolmaǵan.

Kýágerdiń aıtýynsha, ýaqyt óte kele habarlamalardyń ózi kúdik týdyra bastaǵan. «Naýryz ádette qate jazatyn. Al munda hat jazý máneri múlde basqa boldy», – dep túsindirdi ol sotta.

Muqanǵalıev sotta aıyptalýshyǵa da ún qatty. «Alla keshirimdi. Eger adam shyn júrekten ókinse, Alla keshiredi. Biraq sen ata-anańa, bes balańa, Aqbaıannyń týystaryna jáne bizge úlken qaıǵy qaldyrdyń», – dedi ol.

Kýáger Naýryzben birge óskenin jáne ony jaqsy tanyǵanyn aıtty. Onyń sózinshe, Naýryz eshqashan janjalqoı adam bolmaǵan jáne Sársemálıevpen arasynda qandaı da bir aýyr kıkiljiń bolǵanyn aıtpaǵan. Sondaı-aq ol Aqbaıannyń týystary aıyptalýshyǵa qysym kórsetti degen nusqaǵa senbeıtinin aıtyp, marqum adamdardy kinálamaýdy surady.

Muqanǵalıevtiń sózinshe, Násip Óteshqalıeva kerisinshe nemerelerine kómektesýge tyrysqan. Sóz sońynda ol Sársemálıevtiń Naýryz Muqanǵalıevtiń ólimine qatysty aıtqan ózin-ózi qorǵaý nusqasyna kúmán keltirdi. «Adam bir ret pyshaq salǵannan keıin ádette qannan shoshıdy. Al munda júregi tas bolyp ketkendeı», – dedi kýáger.