InfoHub Logo

Qaraǵandy oblysynda tórt kúnnen beri jalǵasyp jatqan qolaısyz aýa raıy jol qatynasyna qysym kórsetýde. Mel, qatty jel jáne kóktaıǵaq saldarynan óńir joldarynda uzyn-sonar keptelister paıda bolyp, kólik qozǵalysy toqtady.

Bul týraly Infohub.kz aqparat agenttigi habarlaıdy.

Keptelistiń sebebi

13 naýryz kúni keshke Qaraǵandy – Astana tasjolynda jaǵdaı kúrt qıyndady. Oshaǵandy kenti mańyndaǵy kóterińki jerde qatty kóktaıǵaqtan júzdegen kólik keptelip qaldy. Júrgizýshilerdiń aıtýynsha, sol jerde shamamen 500 júk kóligi men 700-ge jýyq jeńil avtokólik jınalǵan. Kólikterdiń kóterińki joldy baǵyndyra almaýy saldarynan qozǵalys tolyǵymen derlik toqtady.

Joldaǵy jaǵdaı

Áleýmettik jelilerde taraǵan vıdeoda polısıa qyzmetkerleriniń lopatamen jolǵa qum seýip, kólikterdiń júrip ketýine kómektesýge tyrysyp jatqany kórinedi. Birneshe kún boıy jolda qalǵan júrgizýshiler tamaqsyz, sýsyz jáne janarmaısyz otyrǵanyn aıtty.

Teńiztaý qalasy ákimdiginiń habarlaýynsha, kepteliste qalǵan júrgizýshilerge eriktiler kómek kórsetken. "Shanyraq" ortalyǵynyń eriktileri, jergilikti meshitterdiń ımamdary men jamaǵaty ystyq tamaq taratyp, qoldaý kórsetti.

Resmı jaýap

Qaraǵandy oblystyq polısıa departamentiniń baspasóz qyzmeti Oshaǵandy kenti mańyndaǵy keptelis týraly aqparatty rastady. Vedomstvo joldardy ashý jáne jabý máselesi polısıanyń tikeleı quzyretine jatpaıtynyn atap ótti. Mundaı sheshimderdi jol operatory "QazAvtoJol" qabyldaıdy.

Sońǵy kúnderi óńirde aýa raıynyń kúrt nasharlap, qatty boran, jel jáne kórýdiń nasharlaýy baıqalǵany aıtyldy. Osyǵan baılanysty birqatar jol ýchaskelerinde ýaqytsha shekteýler engizilgen. Polısıa qyzmetkerleri kúsheıtilgen rejımde jumys istep, bes myńǵa jýyq kólikke kómek kórsetken.

Óz kezeginde "QazAvtoJol" kompanıasy adamdardyń úsh kún boıy jolda bolǵany týraly aqparatty joqqa shyǵardy. Kompanıanyń málimetinshe, jol tehnıkasy táýlik boıy jumys istep, kúrdeli ýchaskelerde kólik qozǵalysy toptamamen uıymdastyrylady. Ótken táýlikte myńnan astam kólikke súıemeldeý kórsetilgen.