1. ÚIDEGİ ÚNSİZ QARYNDAS
Qaryndasym, salmaqtym
Qorǵasyn quıǵan asyqtaı.
Byl-sylq etip basqany
Moldalar jazǵan mashyqtaı.
«Shúkir» dep shapshań aıtpaısyń,
«Úsh-sh-sh» deısiń asyqpaı.
Jýyrda jaýap bermeısiń,
Jigerdi jún ǵyp jasytpaı.
Berseń jaýap balbyrap,
Sý tatyǵan jasyqtaı.
Kúńirengeniń - kúlgeniń,
Kózdiń jasy bilgeniń,
Ashýdy ý ǵyp ashytpaı.
Qaıteıin seni, baýyrym,
Tym tuıyq, buıyq balasyń.
Ákeńmenen qol soǵyp,
Alady-aý satyp sasyq baı.

2. BULQYNYP, BUǴAÝ ÚZGEN QARYNDAS
Qorǵasyn quıǵan saqadaı
Sáýlem meniń salmaqty.
Salystyrsam salmaǵyn -
Qala qyzy qańbaq-ty...
Meniń baýyrym syzylyp,
Sándenýshi edi salmaqty...
Sol salmaǵy cop bolyp,
Talasta talaı qor qylyp,
Tistetip edi barmaqty.
Sol baýyrym bul kúnde
Qur salmaqpen qalmapty.
Ushan darıa aqyly
Azattyq urandy ańdapty.
Andaǵan soń, bulqynyp,
Mal bergenge barmapty.
Kóndirem dep eppenen,
Aǵa, jeńge arbapty...
Aq batany buzdyń dep,
Ata-anasy qarǵapty.
Qara ormandaı qaırattym
Qaıyspapty qarǵysqa...
Arbaýǵa kulaq salmapty.
«Men endi azat adam,- dep,-
Súıgenime baram»,- dep,
Tas túlekteı talpynyp,
Ózine teńdi tańdapty.
Bergeli jaýap jarymen
Burala basyp, maıysyp
Mekemege kirgende,
Syzylyp sóılep salmaqtym,
Bir sózinen tanbapty.
Habaryńdy estip osynaý
Buǵaý úzip bosanǵan,
Súıgenine qosylǵan,
Qýanysh syımaı qoınyna,
Tartý qylyp toıyńa,
Ýystap shashqan shashýdaı
Aǵań óleńdi ańdatty...

3. OQÝDAǴY QARYNDAS
Baýyrsaq muryn, búırek bet,
Qaımaq qabaq, qara qyz
Kamzolynyń tósine
Qadap alyp «aı», «juldyz»,
Jyly byltyr boıjetken
Bop qara qyz maıysqan.
Bıyl basta kón shapke,
Kamzol kıgen qaıystan.
Kúzdi kúni kelip ed
Tebinip qap túıesin.
Kórdim keshe: úńilip,
Oqıdy «turmys júıesin».
Oqıdy, kózin ashady,
Oılap túrli, pikirleıd.
«Esen be, shyraq?»- dep edim,
«Úsh-sh-sh» demeıdi, «shúkir» deıd.
Sóılesip em, tezirek
Sózdi burdy aýylǵa.
Nelikten munsha aýylshyl?
Apasy qapty-aý aýylda...

4. JOLǴA SHYQQAN QARYNDAS
Qushaqtap súıip sińlisi
Teteles týǵan ápkesin,
Kıdi jolǵa shyqpaq bop
Kón shapan men shapkesin.
Baıaǵynyń kıimi
Jasqa qaıdan shaq kelsin.
«Teńdik» degen uranǵa
Toltyrdy qolda papkesin.
Kóndirdi de, sendirdi:
«Kelem, kút!»- dep ápkesin.
Torsyq betti borsyq baı
Qaqalsyn meıli, «qap!» desin,
Qaryndasqa jol shyqqan
Biz joldaspyz aınymas.
Azattyqty ańsaǵan
Ápkesine ap kelsin.

5. QYZMETTEGİ QARYNDAS
Torǵaıdaı tańmen oıandy,
Oıanǵan soń jatpady.
Azattyq izdep sharq urdy,
Turmysta tushshy tatpady...
«Buzylǵan bala» atandy,
Basynda jurtqa jaqpady.
Byqsyq, sasyq ósekti
Tabanǵa saldy, taptady...
Boı baqpady, oı baqty...
Betine boıaý jaqpady.
Shubaltyp uzyn shash qoıyp,
Shyldyrlap sholpy taqpady.
Shapke kıip, papke alyp,
Baıandama jattady.
Orynbor, Máskeý aralap,
Jazy-qys damyl tappady.
Aryp-ashyp el kezip,
Qaıǵylyny hattady.
Kúń bop ezilip, egilip
Jylaǵandy jaqtady.
Sýyrylyp topta sóz sóılep,
Áıel muńyn joqtady.
Qysqasy, áıel jynysyna
Qara ormandaı qyzmet qyp,
Órkeni óskir qaryndas
Aqtady úmitti, aqtady.

---