Qasym-Jomart Toqaev pen Gýrbangýly Berdimuhamedov Túrkistandaǵy tarıhı jáne mádenı nysandardy aralady
Qazaqstan Prezıdenti Qasym-Jomart Toqaev pen Túrikmenstan Halk Maslahatynyń Tóraǵasy Gýrbangýly Berdimuhamedov Túrkistan qalasyndaǵy birqatar tarıhı jáne mádenı oryndarǵa bardy.
Memleket basshylary aldymen «Kúltóbe» qalashyǵyn mýzeıge aınaldyrý barysymen tanysyp, kóne shahardy saqtaý jáne abattandyrý jobasy boıynsha aqparat aldy. Jalpy aýmaǵy 27 gektardy quraıtyn arheologıalyq qazba jumystary aıaqtalǵan. Sonymen qatar, taıaý ýaqytta ashylatyn «Qolónershiler qalashyǵynyń» tujyrymdamasy tanystyryldy. Bul aýmaqta sheberhanalar, ulttyq taǵamdar usynatyn oryndar, shyǵys bazary men shaǵyn qonaqúıler ornalasatyn bolady. Aıta keteıik, bıyl 25 naýryzda Túrkistanǵa World Craft Council halyqaralyq uıymy «Qolónershiler qalasy» mártebesin bergen.
Sapar aıasynda Qasym-Jomart Toqaev pen Gýrbangýly Berdimuhamedov Qoja Ahmet Iasaýı kesenesindegi tarıhı jádigerlermen tanysty.
Keıin taraptar «Áziret Sultan» mýzeı-qoryǵy aýmaǵyndaǵy «Etnoaýyl» ulttyq-mádenı keshenine bardy. Onda shyǵys bazaryn aralap, dándi daqyldardyń suryptaryn kórip shyqty. Qonaqtarǵa ulttyq taǵamdar, aǵash óńdeý, kilem toqý, kıiz basý, qysh pen zergerlik buıymdar jasaý syndy qolóner sheberleriniń jumystary kórsetildi. Sondaı-aq, qazaq halqynyń salt-dástúrin tanytatyn teatrlandyrylǵan qoıylym usynylyp, tazy men qyran qustar tanystyryldy.
You Might Also Like
-
Qazaqstanda kólik quraldaryn tirkeý jáne júrgizýshi kýáligin alý úderisine zamanaýı tehnologıalar engiziledi. Osy baǵyttaǵy jańa bastamalar, elimizde azamattarǵa kórsetiletin qyzmetterdi tıimdi jáne...
-
2025 jyldyń alǵashqy toqsanynda Qazaqstanda zeınetaqy tólemderine bólingen qarajat kólemi 1 trıllıon 44 mıllıard teńgeden asty. Bul týraly Eńbek jáne halyqty áleýmettik qorǵaý mınıstrligi habarlady.
