InfoHub Logo

Beıjiń Olımpıadasynyń chempıony, qazaqstandyq boksshy Baqtıar Sársekbaev Italıada ótip jatqan Qysqy Olımpıada oıyndarynda altynnan alqa taqqan mánerlep syrǵanaýshy Mıhaıl Shaıdorovty erekshe quttyqtady. Ol jas sportshyǵa arnaǵan jyly lebizin bildirip, aldaǵy jolyna aqyl-keńesin aıtty.

Bul týraly Infohub.kz aqparat agenttigi habarlaıdy.

Shynaıy quttyqtaý

«Jaradyń, Mısha! Olımpıada chempıony ataný ońaı emes ekenin, qıyn da aýyr joldan ótpeı, altyn medaldi jeńip alý múmkin emestigin dáleldediń! Sen ótken joldan men de, basqa da Olımp shyńyn baǵyndyrǵan aǵalaryń da ótken. Talaı ret kókiregimnen ıterip, aıaǵymnan shalǵandar boldy. Synyp ketetindeı kezder de jetkilikti boldy, biraq sol qıyndyqtarǵa synbaı, armanyma jettim», - dep jazdy Baqtıar Sársekbaev.

Sporttaǵy qıyndyqtar men qoldaý

Ol óziniń sporttyq jolynda kezdesken qıyndyqtardy eske alyp, Mıhaıl Shaıdorovtyń da osyndaı kezeńderdi bastan keshkenin aıtty. «Seniń de 5 jyl buryn kórgenińdi keıbireýler jarysa jazyp jatyr. Bárimizdiń basymyzdan ótken... Sol kezdegi basshylardan da qaıyr kórgen joqpyz. Biraq Allaǵa shúkir, zaman ózgerip, sportqa degen kózqaras jaqsardy. Qazaq sporty eńsesin kóterip, árbir jarystan jaqsy jańalyqtarmen oralyp júrmiz», - dep tolyqtyrdy Olımpıada chempıony.

Jas chempıonǵa aqyl-keńes

Baqtıar Sársekbaev Mıhaıl Shaıdorovtyń Olımpıada shyńyn baǵyndyrýyna kóp adamnyń septigi tıgenin atap ótti. «Áli jassyń ǵoı, alda áli alar asýyń kóp. Kelesi Olımpıada altynyn da syılarsyń bizge! Mıshabaı, Máke, búgin – seniń kúniń, seniń ekinshi týylǵan kúniń. Bul kún qaıtyp kelmeıdi, uzaqqa da sozylmaıdy. Qazirgi kókke kótergen halyq, sál shalyssań, júndeı tútedi. Baýyrym, ańqyldaǵan túrińdi kórip, júregim ezilip qýandym, osy qalpyńda qal! Eshkimniń jeteginde ketpe! Tún balasy uıqy kórmeı, seniń tileýińdi tilegen halqyńnyń qýanyshyn sý sepkendeı etkisi kelgenderden aýlaq bol! Qosh keldiń Máke, qatarymyzǵa!», - dep jazbasyn aıaqtady.