InfoHub Logo

Joldasym jumysta otyrsa, jupyny kıingen qart kisi kelip:

— Balam tońyp kettim, senderdiń jyly bólmelerińde jylynyp alsam bola ma? — depti.

— Kirińiz, jylynyńyz depti joldasym.

Ústindegi kónetoz juqa kúrteshe jylý bermesi anyq, kıimderi jupyny, İshkish adamǵa uqsamaıdy.«Balam Raıymbek aýdanynan kele jatyr edim, Qaskeleń jaqta qyzym turady, soǵan bara jatqan betim edi, aıaldamada kóp turyp tońyp qaldym» depti. Joldasym jón surasqan soń jany ashyp:

— Ata men sizdi úıime aparaıyn, kelinińizdiń qolynan shaı iship jylynyp alyńyz, sosyn ári qaraı jol tartarsyz dep úıge alyp kelipti.

Tamaq ázirlep qoıǵan edim, shaıymdy demdep, dastarhanǵa shaqyrdym. Tamaqtanyp otyryp ata áńgimesin bastady. «Balalarym, meniń basymnan ótkendi, senderdiń bastaryńa bermesin. Men jastyqtyń jalynymen kóp qatelikke boı aldyrdym. Áıelim men úsh balamdy tastap, bir shúıkebastyń jeteginde kettim. Beti basyn árlep, kózin oınaqshytqan sylqym kelinshekti kindigimnen shyqqan balalarymnan, qyzdaı qosylǵan qosaǵym, balalarymnyń anasynan artyq kórdim. Aıaǵy otbasymdy nápsiniń jolynda qurban ettim. Qartaımastaı kórindim. Jastyq shaq ótti, keshegi sylqym kelinshek, boıymnan qýat, qolymnan tabys ketken soń túrtpektep sıdyrmady. Aýyrý qalsa da ádet qalmaıdy eken. Meniń kózime shóp sala bastady. Otbasyma barýǵa batylym jetpeı aýylǵa oraldym. Óz otbasym qalada. Balalarym er jetken soń, úlken ul, áıelimdi aýyldan kóshirip alyp ketken. Áıelim de o dúnıelik bolyp ketipti. Keshegi men tastap ketken úsh balam da er jetti. Eki ul Almatyda, bir tal qyzym Qaskeleńde turady. Analary qaıtys bolǵan soń úlken ul meni aıap, ózi kelip, qolyna alyp ketken bolatyn. Jastaıynan qaraılaspaǵan maǵan kelin jyly qabaq tanyta qoımady. Biraz turyp, ekinshi uldyń qolyna bardym. Ol úıde de, men úshin jıi renjisip qalatyndaryn baıqadym. Birde janjal ústinde kelinniń «kezinde tastap ketken ákeńdi sen nege baǵýyń tıis, qyzyna barsyn» degen sózin estip qaldym. Sodan kıimderimdi jınap qyzymda biraz boldym. Qyzdyń aty qyz ǵoı asty-ústime túsedi. Biraq kúıeý balanyń qabaǵyn qashanǵy ańdıyn, aýylǵa qaıta oraldym. Qartaıǵanda qadirim qashyp, kereksiz etip tastap ketken balalarym keshirgenimen, kóńilderinde kirbiń baryn sezemin. Týra joldan taımaı, otbasymdy asyrap jetkizsem, múmkin balalarym da, kelinderim de basqasha qarar ma edi.

Olarǵa qandaı ókpe aıtamyn. Aýylda jaǵdaı jaman emes, pensıam bar. Otyn sýyma, shaılyǵyma jetedi. Qyzym kelip ket degen soń qyzyma shyqqan betim ǵoı. Dúnıe alma kezek balalarym, ne ekseń sony orasyń, ekeýińniń juptaryń jazylmasyn. Bala-shaǵalaryńnyń qyzyǵyn kórýge jazsyn» dep ata sózin aıaqtady. Atany bir jaǵynan qylyǵyna qaraı jek kórsem de, myna jupyny túrin kórip aıap kettim. Joldasymnyń kımeı júrgen tony bar edi, sony kıgizip edim jarasa ketti. Joldasymnyń kıimderin qoparyp, taǵy da bir shalbar, ústine jempir taýyp kıgizdim. Qyzdyń júregi názik ǵoı ata, sizdi jaqsy jaǵynan kórsin, nemerelerińizdiń aldynda qalypty jaǵdaıda kórinińiz, nemerelerińizge aparyńyz dep kámpıt-sámpıt salyp berip, joldasym avtobýsqa otyrǵyzyp jiberdi. Ata alǵysyn jaýdyryp, batasyn berip jatyr! Alla táýbesine kelgen qulyńnyń nyǵmetin arttyra kór! Bul kisiniń jibergen qateligi bireýlerge sabaq bolar degen nıette jazyp otyrmyn. Alla bizderdi bala-shaǵanyń aldynda ádemi qartaıýdy násip etsin! Ámın!

---