InfoHub Logo

Eki sheteldik bloger Almatyda áleýmettik jelide qazaq qyzdaryn qorlaǵany úshin 15 táýlikke qamaýǵa alyndy. Alaıda, bul is olar úshin tek ákimshilik jazamen aıaqtalmaıtyny belgili boldy. Qazirgi ýaqytta Qazaqstan Respýblıkasy Qylmystyq kodeksiniń 174-baby, ıaǵnı «Áleýmettik, ulttyq, rýlyq, násildik nemese dinı alaýyzdyqty qozdyrý» boıynsha qylmystyq is qozǵalyp, tergeý bastaldy.

Bul týraly Infohub.kz aqparat agenttigi habarlaıdy.

Bas prokýrordyń orynbasary Ǵalymjan Qoıgeldıevtiń aıtýynsha, bul burynǵy ákimshilik isten bólek, jańa qylmystyq is bolyp tabylady. Atalmysh baptyń 2-bóligi boıynsha, eger bul áreketter bir top adammen, aldyn ala sóz baılasý arqyly, birneshe ret jasalsa, nemese qyzmet babyn paıdalanyp, shet eldik aqparat quraldaryn qoldanyp jasalsa, onda 5 jyldan 10 jylǵa deıingi merzimge bas bostandyǵynan aıyrý jazasy kesilýi múmkin.

Strımerlerdiń áreketine qatysty

Buǵan deıin eki sheteldik strımer tikeleı efır kezinde qazaqstandyq qyzdar týraly qorlaıtyndaı pikirler aıtqan bolatyn. Bul úzindiler áleýmettik jelide tez taralyp, qoǵamda úlken narazylyq týdyrdy. Sosıal jelidegi tolqýlardan keıin, jergilikti turǵyndar blogerlermen kezdesip, kópshilik aldynda keshirim suraýdy talap etti. Keıinnen quqyq qorǵaý organdary aralasyp, Almaty polısıasy tekserý júrgizip, eki sheteldikke ınternette usaq buzaqylyq jasaǵany úshin 15 táýlik ákimshilik qamaqqa alý jazasyn taǵaıyndady.

Basqa strımerlerdiń reaksıasy

Bul jaǵdaıdy strımerler qaýymdastyǵy da belsendi talqylady. Keıbir blogerler sottyń sheshimin qoldasa, endi biri muny qylmys dep sanamaıtynyn málimdedi. Osy oqıǵaǵa qatysqandardyń biri ózine qatysty qýdalaý men qorqytýdy toqtatýdy ótindi.