Qazaqtyń qandaı edi máǵıshaty,
Bir kúnde kóship qonǵan rahaty.
Qaıǵy joq, hasiret joq, qyz-bozbala,
Túzegen basekemen saltanaty.
Ketýshi ed kóshbasshylar ilgeri ozyp,
Jarasyp óz forymynsha saıasaty.
Jarysyp jas balalar júrýshi edi
Jaratqan úki taǵyp júırik aty.
Jaılaýǵa shyǵa aıǵyr sýytýshy edi,
Ystyqtyń qalmaıdy dep zararaty.
Tizilip kól jaǵalaı qonýshy edi,
Jarasyp aq úılerdiń qıafaty.
Kókoraı shalǵyndarǵa bıe baılap,
Baılyqtyń kórinýshi edi ǵalamaty
Jan-janýar rahatpen bir jasaýshy ed,
Kirgendeı bólmesine jer jánnaty.
İshken mas, jegen toq bop júrýshi edi,
Túzelip bozbalalyq saıahaty.
Búldirgen, shıe tere ketýshi edi,
Qyz-kelinshek myrzalardyń jamaǵaty.
Keńeıip jurttyń fıǵyly ol ýaqytta
Nasharǵa tıýshi edi sharafaty.
Ul týyp, kelin tússe, qyz uzatyp,
Toı bolyp at shabýshy ed bir ǵádáti.
Bek ǵajap marqumdarǵa as berýshi ed,
Fash bolsa halyq ishinde ınafaty.
Baýyzdatyp baǵlandy, qulyn soıyp,
İshse qymyz, kelýshi edi sózdiń sharty.
Qanikeı, osy aıtqannyń biri bar ma,
Aıtylsa sózdiń kámil haqıqaty.
Bul kúnde bulardy oılap qaıǵy da júr,
Bar bolǵan danyshpandar farasaty.
Oqyǵan paıda berer jastarymyz,
hár isten bolsa máger maǵlumaty.
* * *
Úırengen halyqpyz ǵoı kemshilikke,
Talpynyp umtylmaıtyn keńshilikke.
Osyndaı bilingen soń minezimiz
Kim de kim bizdiń jurtty elsinip pe?
Rýssıada jıyrma mıllıon bar musylman
Jeri joq osylardyń bir qosylǵan.
Máselen bizdin qazaq bul ýaqytta
Tysqary rýhanı ıdaradan.
Bola almaı tilek qabyl hafalyqta.
Kórýde jábirshilik júrmiz haman.
Qazaǵym kórmegeniń áli aldyńda,
Bolarsyń kóne berseń munan jaman.
Bosynda aıaq-qolyń qımyldap qal.
Bir kúnde typyrlaýǵa kelmes shamań.

---