InfoHub Logo

"Qazaqmys" korporasıasy 2026-2028 jyldarǵa arnalǵan ónerkásiptik qaýipsizdikti transformasıalaý strategıasyn bekitti. Maqsaty – jaraqattanýdy azaıtý, táýekelderdi baqylaýdy kúsheıtý jáne ólimmen aıaqtalatyn jaǵdaılardy nólge teńeý. Bul týraly korporasıanyń baspasóz qyzmeti habarlady.

"Qazaqmys" kompanıalar tobynda ónerkásiptik qaýipsizdik jáne eńbekti qorǵaý máselelerine arnalǵan strategıalyq sesıa ótti. Otyrysty "Qazaqmys" korporasıasy" JSHS basqarma tóraǵasy Rýslan Óskenáli ótkizdi.

Kezdesýdi asha otyryp, ol óndiristik mindetterdi tek qaýipsizdik talaptaryn qatań saqtaǵan jaǵdaıda ǵana oryndaýǵa bolatynyn atap ótti.

"Ónerkásiptik qaýipsizdik – bizdiń birinshi kezektegi basymdylyǵymyz. Óndiristik josparlar tek qaýipsizdik talaptaryn sózsiz saqtaǵan kezde ǵana oryndalady. Biz basqarýshylyq tártipti kúsheıtip, biryńǵaı basqarý kontýryn quramyz. Qyzmetkerlerdiń ómiri men densaýlyǵyna qatysty máselelerde eshqandaı ymyraǵa jol berilmeıdi", - dedi Rýslan Óskenáli.

Talqylaýǵa basqarma músheleri, óndiristik bólimshelerdiń basshylary, tehnıkalyq mamandar, sondaı-aq halyqaralyq "JMJ Associates" kompanıasynyń keńesshileri qatysty. Strategıany eńbekti qorǵaý blogy Janbek Esmahanovtyń basshylyǵymen daıyndady. Negizge jumys júıesiniń keshendi baǵalaýy, sonyń ishinde ishki aýdıt jáne táýelsiz halyqaralyq zertteý alyndy.

Taldaý qorytyndysy boıynsha basqarýshylyq tártipti kúsheıtýge jáne barlyq deńgeıdegi jaýapkershilikti arttyrýǵa baǵyttalǵan negizgi baǵyttar aıqyndaldy.

Kompanıa aqparaty boıynsha, bekitilgen strategıa 2026-2028 jyldarǵa arnalǵan. Qujat óndiristik táýekelderdiń sebepterimen júıeli jumys isteýge jáne barlyq deńgeıdegi qaýipsizdik mádenıetin damytýǵa kóshýdi kózdeıdi. Strategıa nóldik jaraqattaný qaǵıdatyna negizdelgen jáne táýekelderdi basqarý júıesin jetildirý men qaýipsizdik salasyndaǵy kóshbasshylyqty damytýdy qamtıdy.

Kompanıada sheshimderdiń oryndalýyn baqylaıtyn ónerkásiptik qaýipsizdik jáne eńbekti qorǵaý jónindegi ortalyq komıtet qurylady. Otyrystar toqsanyna kem degende bir ret, al jergilikti jerlerde aı saıyn ótkizý josparlanýda.

2026 jyl – Qaýipsizdik jyly dep jarıalandy. Basqarý júıesin, analıtıkany damytýǵa jáne aldyn ala kórsetkishterdi engizýge basa nazar aýdarylatyny atap ótildi.

Sondaı-aq, táýekelderdi baqylaýdyń biryńǵaı standarttary, basshylardyń rólin kúsheıtý, qaýipsizdik talaptaryn bıznes-prosesterge ıntegrasıalaý jáne jabdyqtardy jańartý qarastyrylǵan.

Negizgi maqsat – ınsıdentterge jaýap berýden olardy aldyn alýǵa kóshý, jaraqattanýdy azaıtý jáne ólim-jitimdi nólge jetkizý.

Bul týraly Infohub.kz aqparat agenttigi habarlaıdy.