InfoHub Logo

Qazaqstannyń mını-fýtboldan ulttyq quramasy SOCCA formatyndaǵy Eýropa chempıonatynyń fınalyna shyqty. Bul tarıhı jetistik Albanıanyń Tırana qalasynda ótip jatqan dodada oryn aldy. Komanda AFC Allur klýbynyń bazasynda qurylǵan.

Bul týraly Infohub.kz aqparat agenttigi habarlaıdy.

Joldama alǵan jol

Qazaqstan quramasy fınalǵa deıingi jolda senimdi oıyn kórsetti. Toptyq kezeńde Portýgalıany 1:0 esebimen jeńip, Latvıamen (0:0) jáne Ýkraınamen (2:2) teń oınady.

Pleı-off kezeńinde komanda Eýropanyń myqty qarsylastaryn artta qaldyrdy. 1/8 fınalda Germanıany 4:0 esebimen oısyrata jeńse, shırek fınalda álem jáne Eýropanyń sol kezdegi chempıondary – Polsha quramasyn 1:0 esebimen tize búktirdi. Jartylaı fınalda Vengrıany 2:0 esebimen utty.

Fınaldaǵy qarsylas

Endi qazaqstandyq komanda fınalda Ispanıamen kezdesedi. Oıyn Qazaqstan ýaqytymen saǵat 23:00-de bastalady. Translásıany QazSport telearnasynan jáne SOCCA Federation YouTube kanalynan tamashalaýǵa bolady.

Bıznestiń qoldaýy

Kompanıa ókilderiniń aıtýynsha, bul jetistik – elimizdegi mını-fýtboldyń damýyna jáne sportty qoldaýǵa baǵyttalǵan júıeli jumystyń nátıjesi. Allur kompanıasy kóp jyldar boıy sportty damytýǵa, salaýatty ómir saltyn nasıhattaýǵa belsendi ınvestısıa salyp keledi. AFC Allur bazasynda ulttyq quramanyń qurylýy – Qazaqstannyń halyqaralyq bedelin nyǵaıtýǵa baǵyttalǵan sport pen otandyq bıznestiń tabysty sınergıasynyń mysaly.

Búginde Qazaqstan quramasy halyqaralyq arenada el namysyn qorǵap qana qoımaı, elimizdegi myńdaǵan jas sportshylarǵa úlgi bolyp, SOCCA qozǵalysynyń álemdik kóshbasshylarynyń biri retinde Qazaqstannyń mártebesin rastap otyr.