InfoHub Logo

Qazaqstan 1941 jyldan bergi meteorologıalyq baqylaý tarıhyndaǵy eń ystyq jyldy bastan keshti. Bul týraly Infohub.kz aqparat agenttigi habarlaıdy.

Qazgıdromettiń «Qazaqstan aýmaǵyndaǵy klımat erekshelikteri týraly 2025 jyl» atty taldaý sholýynda eldegi temperatýra rejımi, jaýyn-shashyn mólsheri, qar jamylǵysynyń jaı-kúıi, agroklımattyq jaǵdaılar, sondaı-aq Kaspıı teńizi men Balqash kóliniń jaǵdaıy týraly derekter keltirilgen.

Qazaqstan klımaty jylynýda

Sholýǵa sáıkes, klımattyq baǵalaý el aýmaǵynda turaqty jylynýdy kórsetedi. 1960 jyldardan bastap Qazaqstanda ár onjyldyq aldyńǵy onjyldyqtan jylyraq bolyp keledi.

2016–2025 jyldardaǵy ortasha temperatýra normadan 0,83 gradýs joǵary bolyp, +7,11 gradýsty qurady. 2021–2025 jyldar kezeńi +7,55 gradýs kórsetkishimen eń jyly besjyldyq boldy.

Eń jyly on jyldyń toǵyzy XXI ǵasyrǵa tıesili, bul klımattyń ózgerýiniń údere túskenin rastaıdy.

2025 jylǵy rekord

2025 jyly temperatýra anomalıasy +2,11 gradýsqa jetti. Bul buryn rekordtyq bolyp sanalǵan 2023 jylǵy kórsetkishten (+1,73 gradýs) joǵary.

Ásirese, soltústik-batys, ortalyq óńirlerde, sondaı-aq Qyzylorda oblysynda jáne batys pen shyǵys óńirleriniń jekelegen bólikterinde +2,5 gradýstan joǵary aýytqýlar tirkeldi.

Qazaqstannyń 176 meteostansıasynda ekstremaldy joǵary temperatýra kórsetkishteri, al 138 stansıada 2025 jyl 1941 jyldan bergi baqylaý tarıhyndaǵy eń jyly jyl boldy.

Jaýyn-shashyn norma sheginde

El boıynsha ortasha jyldyq jaýyn-shashyn mólsheri 295,7 mıllımetrdi qurady, bul normanyń 91,8 paıyzyna teń.

Jambyl jáne Túrkistan oblystarynda jaýyn-shashynnyń tapshylyǵy baıqaldy. Al Pavlodar oblysynda normadan 23 paıyzdan astam artyqshylyq tirkeldi.

Eń kóp jaýyn-shashyn soltústik jáne shyǵys óńirlerde baıqalyp, kórsetkishter normadan 150 paıyzǵa deıin asty.

Uzaq merzimdi tendensıalar

Sınoptıkter 1976–2025 jyldar kezeńinde Qazaqstandaǵy ortasha jyldyq temperatýra onjyldyqta orta eseppen 0,4 gradýsqa ósetinin atap ótti.

2000 jyldardyń basynan beri oń temperatýralyq aýytqýlar basym boldy, al 2010 jyldardan keıin jylyný tendensıasy kúsheıdi.

2026 jyldyń jazy Qazaqstanda qandaı bolady?

Buǵan deıin sınoptıkter Qazaqstanǵa arnalǵan 2026 jylǵy jazǵa arnalǵan konsýltatıvtik aýa raıy boljamyn usynǵan bolatyn. Olardyń málimetinshe, ystyq kezeńderdiń, qysqa merzimdi jańbyrlardyń, naızaǵaıdyń, burshaqtyń jáne ekpindi jeldiń úılesimi kútiledi.