InfoHub Logo

Qazaqstannyń keıbir aımaqtarynda qańtar aıynda aýa temperatýrasynyń tarıhı kórsetkishteri jańartyldy. Tipti 51 jyl boıy saqtalyp kelgen rekordtyq jylylyq ta buzyldy. Anomaldy ystyqtan keıin kúrt sýyqtar bastalǵany baıqaldy.

Bul týraly Infohub.kz aqparat agenttigi habarlaıdy.

Anomaldy jylylyq jáne jańartylǵan rekordtar

«Qazgıdromettiń» sınoptıkteriniń aıtýynsha, qańtardyń alǵashqy onkúndiginde elimizdiń barlyq aýmaǵynda, al ekinshi onkúndiktiń basynda ońtústik óńirlerde temperatýra normadan joǵary boldy. Ortalyq Azıadan jyly aýa massalarynyń kelýine baılanysty birqatar aımaqtarda tarıhı maksımýmdar jańartyldy.

Máselen, 11 qańtarda Qaraǵandyda aýa temperatýrasy +5,5 gradýsqa jetti. Bul 2016 jylǵy burynǵy rekordty 1,5 gradýsqa asyrdy.

Shymkentte termometr baǵany +17,4 gradýsqa kóterildi. Bul 1987 jylǵy rekordtan (+17,3 gradýs) joǵary. Tarazda +19,3 gradýs tirkeldi, bul 1999 jylǵy burynǵy maksımýmnan (+14,2 gradýs) áldeqaıda joǵary.

12 qańtarda Aqtaýda aýa +13,4 gradýsqa deıin jylyndy, bul 2025 jylǵy rekordty (+9,7 gradýs) arttyrdy. Sol kúni Qaraǵandyda +1,2 gradýs tirkeldi, bul 1975 jylǵy kórsetkishten (+1,0 gradýs) joǵary. Osylaısha, 51 jyl burynǵy temperatýra rekordy jańartyldy.

Semeıde temperatýra +1,5 gradýs boldy, bul da 1975 jylǵy mánnen (+1,0 gradýs) joǵary. Óskemende aýa +4,4 gradýsqa deıin jylyndy, bul 1987 jylǵy rekordty (+3,4 gradýs) asyrdy.

13 qańtarda Túrkistanda +16,8 gradýs tirkeldi, bul 1986 jylǵy maksımýmnan (+11,3 gradýs) joǵary.

-42 gradýsqa deıingi aıaz

Sonymen qatar, eldiń soltústik bóliginde Jańa Jer aýdandarynan sýyq aýa massalarynyń kelýimen temperatýra kúrt tómendedi.

Túnde termometr baǵany -30…-38 gradýsqa deıin tómendedi. Shyǵys Qazaqstan jáne Abaı oblystarynda aıaz 40 gradýsqa jetti. Marqakól meteostansıasynda -42,6 gradýs tirkeldi.

Astanadaǵy jaǵdaı

Astanada qańtar aıynyń ortasha temperatýrasy norma boıynsha -14,5 gradýs bolsa, -14,3 gradýs tirkeldi. Aıdyń eń jyly kúni 11 qańtarda +1,6 gradýs boldy. Eń sýyq kún 17 qańtarǵa keldi, temperatýra -28,3 gradýsqa deıin tómendedi.

Aı ishinde 23 mıllımetr jaýyn-shashyn tústi, bul normadan (18 mıllımetr) 128 paıyzdy quraıdy.