InfoHub Logo

Qazaqstanda elektromobılderdi anyqtaýdy jeńildetý maqsatynda arnaıy jasyl tústi memlekettik nómirler engizilýi josparlanýda. Bul týraly İshki ister mınıstriniń orynbasary Sanjar Ádilov málimdedi.

Bul ózgeris arnaıy turaqtarda, zarádtaý stansıalarynda jáne basqa da erekshe qoljetimdi aımaqtarda elektromobılderdi tez arada ajyratýǵa múmkindik beredi.

«Elektromobılderge arnalǵan memlekettik nómirlerdiń fonyn ózgertý qajettiligi týyndap otyr. Álemdik tájirıbede bul nómirler jasyl túspen boıalady, sondyqtan bul másele qarastyrylyp, qoldaýǵa ıe bolyp otyr», - dedi Ádilov.

Depýtat Arman Qalyqov bul bastamany qoldap, qazirgi kezdegi avtomatty júıeler men kameralardyń elektromobıl men qarapaıym kólikti ajyrata almaıtynyn atap ótti. Bul jaǵdaı ekologıalyq taza kólik ıelerine turaqtarda jáne basqa da aımaqtarǵa kirý kezinde qıyndyqtar týdyrady.

«Tehnıkalyq quraldar elektromobıldi kádimgi kólikten árqashan ajyrata almaıdy. Bul ásirese erekshe qorǵalatyn tabıǵı aýmaqtarǵa kirý kezinde baıqalady. Sondaı-aq, jol polısıasy qyzmetkerleriniń jumysynda da qıyndyqtar týyndaıdy. Osy zań jobasy aıasynda bizdiń ekologıa komıteti elektr kólikterine bólek memlekettik nómir túsin qoldanýdy usyndy», - dedi Qalyqov.

Esterińizge sala keteıik, 2024 jyldyń 18 qyrkúıeginen bastap Qazaqstanda elektromobılderge tegin turaq quqyǵyn beretin zań kúshine engen bolatyn. Qazirgi ýaqytta bul úshin júrgizýshiler rastaıtyn qujattardy kórsetýi kerek, biraq tústi nómirlerdi engizý barlyq rásimderdi jeńildetedi dep kútilýde.