InfoHub Logo

Endi 2 aıdan keıin elimizdiń orta mektebin birneshe ondaǵan myń oqýshy aıaqtap, joǵary oqý oryndarynyń talapkerleri qataryna qosylady. Osyǵan oraı QazAqparat Qazaqstannyń joǵary oqý oryndary qaýymdastyǵynyń málimetterine súıene otyryp, memlekettik grantqa ilige almaǵan talapker aqyly oqýǵa túser bolsa, ata-anasynyń qaltasyna qanshalyqty salmaq túsiretindigin saraptap kórýge tyrysqan bolatyn. Nazarlaryńyzǵa atalmysh saraptamany usynamyz.

Birden aıta keterligi, elimizdegi oqý aqysy eń joǵary bilim ordalary qatarynda áli kúnge deıin «Qazaqstan menejment, ekonomıka jáne boljaý ınstıtýty», «Qazaq-brıtan tehnıkalyq ýnıversıteti» jáne ulttyq ýnıversıtetter tur.

Sonymen Qazaqstan menejment, ekonomıka jáne boljaý ınstıtýtynda  2016-2017 oqý jylynda bilim alý aqysy barlyq mamandyqtarda birdeı 2 mln. 70 myń teńgeni quraıdy.

Qazaq-brıtan tehnıkalyq ýnıversıtetindegi oqý aqysy QMEBI-ge qaraǵanda birshama tómen. Máselen, aqparattyq tehnologıa fakúltetinde oqyǵyńyz kelse, 1 mln. 520 myń teńge shyǵyndaýyńyzǵa týra keledi. Matematıka jáne kıbernetıka men Qarjy mamandyqtaryn ıgerý quny da sol shamalas. Al ekonomıs bolamyn deseńiz, 1 jylda 1 mln. 800 myń teńge tóleısiz.

Ál-Farabı atyndaǵy Qazaq ulttyq ýnıversıtetindegi orta oqý quny 900 myń teńgeni quraıdy. Bul rette zańgerlik mamandyǵyn alamyn deseńiz, jylyna 990 myń, ekonomıkaǵa 890-990, matematıkaǵa 820-850, halyqaralyq qatynastarǵa 990 myń teńge tóleısiz.

L.Gýmılev atyndaǵy Eýrazıa ulttyq ýnıversıtetindegi oqý quny 710-780 myń teńge aralyǵynda. Bul ýnıversıettegi eń qymbat mamandyqtar qatarynda halyqaralyq quqyq, halyqaralyq qatynastar, ekonomıka, qarjy, esep jáne aýdıt bar.

Asfendıarov atyndaǵy Qazaq ulttyq medısına ýnıversıtetinde «Stomotologıa», «Jalpy medısına» mamandyǵyn alyp shyǵý úshin jylyna 847 myń, al «Farmakologıa» mamandyǵy úshin 770 myń teńge tóleısiz.

Júrgenov atyndaǵy Qazaq ulttyq óner akademıasynyń aǵymdaǵy oqý jylyndaǵy jyldyq oqý quny 600 myń teńgege teń bolsa, Qazaq qyzdar pedagogıkalyq ýnıversıtetinde aqyly bilim alǵysy kelgender jylyna 360 myńnan 443 myń teńgege deıin shyǵyndaýyna týra keledi.

Qaraǵandy memlekettik tehnıkalyq ýnıversıtetindegi ortasha oqý quny - 340 myń teńge. Bul ýnıversıtettegi eń qymbat mamandyqtardyń biri sáýlet óneri sanalady. Dál osy ýnıversıtette atalǵan mamandyqty alyp shyǵamyn deseńiz jyl saıyn qaltańyzda 372 myń teńge bolýy kerek.   

S.Seıfýllın atyndaǵy Qazaq agrarlyq-tehnıkalyq ýnıversıtetinde ekonomıka mamandyǵynda bilim alý 374 myń, sáýlet jáne dızaın 373 myń, aqparattyq tehnologıa 360 myń teńgeni quraıdy.

Aıta keterligi, elimizdegi jekemenshik joǵary oqý oryndarynyń jyldyq oqý aqshasy ulttyq ýnıversıtetterge qaraǵanda áldeqaıda tómen. Máselen, M.Saparbaev atyndaǵy Ońtústik Qazaqstan gýmanıtarlyq ınstıtýtynda zańger, qarjyger mamandyqtarynda oqý aqysy jylyna nebári 150 myń teńge ǵana.

Ádette, elimizdiń joǵary oqý oryndaryndaǵy oqý aqysy jylyna shamamen 10-15 paıyzǵa artyp otyratyndyǵy belgili. Degenmen kóptegen keıbir jekemenshik JOO-lar stýdentterdi kóptep tartý úshin oqý aqysyn ózgertpeıdi. 

Jalpy, joǵary oqý oryndarynda aqyly túrde bilim berý quny elimizdiń «Bilim týraly» Zańyna sáıkes belgilenedi. Ol memlekettik grant kóleminen arzanǵa túspeýi tıis.  Al memlekettik grant kólemi jyl saıyn Qazaqstan Úkimetiniń qaýlysymen bekitiledi. Ázirshe kelesi oqý jylyna onyń kólemi bekitilgen joq.

---