InfoHub Logo

Qazaqstanda júrgizýshi kýáligin alý emtıhandaryn tapsyrý tártibi ózgeredi. Bul sharalar prosestiń ashyqtyǵyn arttyrýǵa, korrýpsıalyq táýekelderdi azaıtýǵa jáne azamattar úshin jaǵdaıdy jeńildetýge baǵyttalǵan.

Bul týraly Infohub.kz aqparat agenttigi habarlaıdy.

Vıse-premer-mınıstr, sıfrlyq damý, ınovasıalar jáne aeroǵarysh ónerkásibi mınıstri Jaslan Madıevtiń tóraǵalyǵymen ótken otyrysta İshki ister mınıstrligimen birlesip birqatar jańalyqtar qaraldy.

Shekteýsiz emtıhan tapsyrý

Endi emtıhanǵa aqyly negizde shekteýsiz ret tapsyrýǵa bolady. Biraq ár tapsyrý arasynda keminde 10 kúndik úzilis bolýy tıis. Bul jańalyq emtıhandy qoljetimdi etip, artyq shekteýlerdi alyp tastap, korrýpsıalyq jaǵdaılardy azaıtýǵa kómektesedi dep josparlanýda.

Qazirgi ýaqytta azamattarǵa úsh ret tegin múmkindik beriledi: ekeýi bir kún aralyqpen, úshinshisi 30 kúnnen keıin. Odan keıin qaıta oqý qajet bolady, bul keıde zańsyz joldarǵa ıtermeleýi múmkin edi.

Inovasıalyq tehnologıalar engiziledi

Sonymen qatar, Astanadaǵy Ulttyq testileý ortalyǵy fılıalynyń bazasynda pılottyq joba iske qosylady. Onda teorıalyq emtıhan kezinde akademıalyq adaldyqty qamtamasyz etý tehnologıalary synaqtan ótedi. Bolashaqta bul tehnologıalar búkil júıege taratylady.

Budan bólek, mamandar testterdiń tıimdiligin zertteıdi. Olar kólik júrgizýge qajetti bilim men daǵdylardy baǵalaýda qanshalyqty jaqsy ekenin anyqtaıdy.

Júrgizýshi kýáligin alý prosesin jańǵyrtý úshin jasandy ıntellekt tehnologıalary da qoldanylmaq. Teorıalyq emtıhandarda tolyqtyrylǵan shyndyq (AR) jáne praktıkalyq bólikti baqylaý úshin kompúterlik kórý (Computer Vision) tehnologıalary paıdalanylady.

Qaýipsizdik jáne jaýapkershilik

Jańa sharalar sıfrlyq sheshimderdiń aqparattyq qaýipsizdigin kúsheıtýdi qamtıdy. Olar mańyzdy aqparattandyrý nysandarynyń tizimine engizilip, buzýshylyqtar úshin qylmystyq jaýapkershilikke deıin tartylý múmkindigi artady.

Sondaı-aq, ákimshilik jaýapkershilik engiziledi. Bul emtıhan tapsyratyndarǵa da, zańsyz jolmen qujat alǵysy keletinderge de qatysty bolady. Atap aıtqanda, tyıym salynǵan qurylǵylardy paıdalanǵany úshin bir jylǵa deıin emtıhan tapsyrý quqyǵynan aıyrylýy múmkin.

Avtomektepterge qoıylatyn talaptar

Budan basqa, avtomektepterge qoıylatyn talaptar qatańdaıdy. Olardyń qyzmetin baǵalaýda júrgizýshilerdi daıarlaý sapasy men azamattardyń pikirleri eskeriledi. Bolashaqta lısenzıalaý engizilip, sapasyz daıarlyq úshin lısenzıadan aıyrý qarastyrylýy múmkin.

Úkimet bul sharalardyń júrgizýshi kýáligin alý kezindegi jasandy kedergilerdi joıýǵa, prosedýranyń ashyqtyǵyn arttyrýǵa jáne korrýpsıany azaıtýǵa baǵyttalǵanyn atap ótti.