InfoHub Logo

Qazaqstanda emhanalarǵa tirkelý tártibi ózgerýi múmkin. Densaýlyq saqtaý mınıstrligi bul baǵyttaǵy ózgeristerdi ázirlep, qazir «Ashyq NPA» portalynda talqylaýda. Jańa erejelerdiń negizgi jańalyqtary qandaı bolady?

Bul týraly Infohub.kz aqparat agenttigi habarlaıdy.

Jyldaǵy tirkelý naýqany joıylady

Endi azamattar jyldyń kez kelgen ýaqytynda, jylyna bir ret basqa emhanaǵa aýysa alady. Buryn bul úshin belgili bir merzim kútýge týra keletin. Mınıstrlik ókili Asel Qydyralıevanyń aıtýynsha, bul ózgeris qarjylandyrýdyń aı saıyn júrgizilýine baılanysty.

«Buryn naýqas jańa emhanany kúzde tańdasa, kelesi jyldyń 1 qańtarynan bastap qana sonda qyzmet ala alatyn edi. Jańa erejeler qabyldansa, tirkelýdi aýystyrǵannan keıingi aıdan bastap jańa emhanaǵa bara alady», - deıdi ol.

Sonymen qatar, basqa qalaǵa nemese aýdanǵa kóship kelgen jaǵdaıda nemese medısınalyq uıym taratylǵan kezde basqa emhanaǵa tirkelý quqyǵy saqtalady.

Aýdannan tys emhana tańdaýǵa bola ma?

Jańa erejelerde emhanalardyń aýmaqtyq shekterin bólý tártibi de naqtylanady. Eger aýdanda jańa emhana ashylsa, jergilikti densaýlyq saqtaý basqarmalary sol aýmaqta jumys isteıtin basqa medısınalyq uıymdardyń qyzmet kórsetý aımaqtaryn qaıta qarastyrýǵa mindetteledi. Bul halyqty emhanalar arasynda teńirek bólýge baǵyttalǵan.

Ár emhananyń ózine bekitilgen mekenjaılar tizimi bar. Ereje boıynsha, olar óz aýmaǵynda turatyn azamattardy tirkeýge mindetti. Bul – jaıaý júrgende 20 mınýttyq qashyqtyq.

Alaıda, keıbir jaǵdaılarda aýdannan tys emhana tańdaýǵa bolady. Bul múmkindik tek júkti áıelder men 5 jasqa deıingi balalarǵa beriledi. Olar naqty turatyn mekenjaıy boıynsha emhanaǵa tirkelýi tıis. Sebebi kishkentaı balalarǵa úıde patronajdyq qyzmet kórsetiledi.

18 jasqa deıingi balalar ata-anasynyń bireýimen birge bir emhanada tirkelýi kerek. Ata-anasy men balasy ártúrli jerde tirkelgen bolsa, emhana basshylyǵy bul máseleni retteýi tıis.

Stýdentter men áskerı qyzmetshiler qalaı tirkeledi?

Shetten kelgen stýdentter men medresede oqıtyndar jaqyn mańdaǵy emhanaǵa elektrondy úkimet portaly arqyly nemese ótinish jazý arqyly tirkele alady. 18 jasqa tolmaǵandar úshin ata-anasy nemese zańdy ókili tirkeý jasaı alady.

Áskerı qyzmetshiler úshin qyzmet ýaqytynda, ıaǵnı bir jylǵa ýaqytsha tirkelý qarastyrylady. Olar muny óz betinshe nemese bólim komandırleriniń kómegimen jasaı alady.

Bul ózgerister emhanaǵa tirkelý júıesin yńǵaıly ári ashyq etýge baǵyttalǵan. Jańa erejeler barlyq múddeli memlekettik organdarmen kelisilgennen keıin birneshe aıdan soń kúshine enedi dep kútilýde.

Qazaqstandyqtar emhanalarǵa qanshalyqty jıi barady?

2025 jyldyń 12 aıynda 16,4 mıllıonǵa jýyq naýqas bastapqy medısınalyq-sanıtarlyq kómekke júgingen. Bir jyl ishinde naýqastardyń emhanaǵa barý jıiligi orta eseppen jylyna toǵyz ret boldy.

Jalpy alǵanda, bastapqy medısınalyq-sanıtarlyq kómek júıesinde 79,8 mıllıon medısınalyq qyzmet kórsetildi. Onyń ishinde memlekettik emhanalarda – 59,1 mıllıon, jeke klınıkalarda – 20,8 mıllıon qyzmet.

2025 jyly medısınalyq uıymdar kórsetilgen kómek úshin bir trıllıon teńgeden astam qarajat aldy.