InfoHub Logo

Qazaqstan aqpan aıynda aýa raıynyń kúrt qubylmalylyǵyn bastan keshti. Birde anomaldy jylylyq baıqalsa, endi birde qalyń qar men boran soǵyp, kóptegen aımaqta temperatýra rekordy jańartyldy. Eldi mekenderdiń kóbinde aýa temperatýrasy klımattyq normadan 1-6 gradýsqa joǵarylap, jaýyn-shashyn mólsheri ádettegiden edáýir asty, dep habarlaıdy Infohub.kz.

Anomaldy jaýyn-shashyn

Aqpannyń basynda Qazaqstan aýmaǵyna belsendi sıklon enip, atmosferalyq fronttardyń ótýine baılanysty qarly jaýyn-shashyn jıiledi. Máselen, 6 aqpanda Astanada bir kúnde 23 mm jaýyn-shashyn tirkeldi. Bul aılyq normanyń (17 mm) 135%-dan asyp túskenin kórsetedi. Túrkistan oblysynda 9-10 aqpan aralyǵynda Aqsaı stansıasynda 91 mm jaýyn-shashyn jaýyp, bul aılyq normadan (74 mm) 23%-ǵa artyq. Abaı oblysynda da 19 aqpanda 15 mm jaýyn-shashyn tirkeldi, bul normadan (7 mm) eki ese kóp.

Jylylyq rekordtary

Aıdyń basynda eldiń ońtústik jáne shyǵys óńirlerine ońtústikten jyly aýa massalarynyń enýi saldarynan jańa temperatýra rekordtary ornatyldy. Máselen, 2 aqpanda Shymkentte +15,6 gradýs jylylyq tirkelip, 2021 jylǵy rekordty (+14,5 gradýs) jańartty. 4 aqpanda Qyzylordada +13,4 gradýs, Túrkistanda +17,5 gradýs jylylyq baıqaldy. Pavlodarda 6 aqpanda temperatýra +2,8 gradýsqa, al Óskemende +4,7 gradýsqa deıin kóterilip, bul da jańa maksımýmdar boldy.

Aqpannyń ekinshi onkúndiginde de rekordtar jalǵasty. 14 aqpanda Aqtaýda temperatýra +17,2 gradýsqa jetip, 2024 jylǵy rekordty (+14,1 gradýs) jańartty. 17-18 aqpanda Aqtaýdaǵy temperatýra +11,4 gradýs boldy, bul 1978 jylǵy kórsetkishten joǵary. Sondaı-aq, 18 aqpanda Pavlodarda (+3,4 gradýs), Semeıde (+5,6 gradýs) jáne Kókshetaýda (+0,8 gradýs) burynǵy temperatýra rekordtary jańartyldy.

19 aqpanda Almatyda tarıhı maksımým ornatyldy – +23,6 gradýs. Bul 1859 jyldan bergi barlyq baqylaý tarıhyndaǵy rekord boldy.

Aıazdy antısıklon aıdy qorytyndylady

Aqpannyń úshinshi onkúndiginde Qazaqstan aýmaǵyna sýyq antısıklon enip, jaýyn-shashynsyz aıazdy aýa raıy ornady. Eldiń soltústik jáne shyǵys óńirlerinde temperatýra -30...-39 gradýsqa deıin tómendedi. Alaıda, eń tómengi temperatýra boıynsha absolúttik rekordtar tirkelgen joq.

Aqpan aıynyń qorytyndysy

Jalpy, sınoptıkterdiń aıtýynsha, 2026 jylǵy aqpan Qazaqstanda anomaldy jylylyq pen qatty aıazdy qatar alyp kelgen aýa raıynyń joǵary ózgerýshiligimen erekshelendi. Jaýyn-shashyn normadan 1,3-6 ese artyq jaýyp, temperatýranyń aýytqýy aıtarlyqtaı boldy. Astanada aıdyń ortasha temperatýrasy -11,4 gradýs boldy, bul normadan 2,2 gradýsqa joǵary. Eń joǵary temperatýra 18 aqpanda (+2,1 gradýs), eń tómengi temperatýra 27 aqpanda (-28,7 gradýs) tirkeldi.