InfoHub Logo

Qazaqstanda biryńǵaı ulttyq testileýdi (UBT) bir ret qana tapsyrý múmkindigi qarastyrylyp jatyr. Bul týraly vıse-premer, mádenıet jáne aqparat mınıstri Aıda Balaeva málimdedi.

Bul týraly Infohub.kz aqparat agenttigi habarlaıdy.

UBT-ny bir ret tapsyrý

Aıda Balaevanyń aıtýynsha, UBT-ny birneshe ret tapsyrý talapkerlerdi sapaly irikteý mindetin tolyq sheshpeıdi. Sondyqtan testileýdi tutastaı qaıta qarap, grant konkýrsyna qatysý úshin bir rettik, obektıvti jáne túpkilikti baǵalaý júıesin bekitý qajet.

«Bul rette bilimdi ózindik baǵalaý jáne daıyndyq ádisterin ýaqtyly túzetý úshin synaq testileýleri júıesi saqtalady», - delingen taratylǵan málimdemede.

Mınıstr UBT-ny transformasıalaýdy júıeden bas tartý emes, «talanttardy dálirek, tereńirek jáne ádil irikteýge baǵyttalǵan qadam» dep atady.

Buǵan deıingi ózgerister

Buǵan deıin Qazaqstanda shetelde moıyndalatyn jáne UBT-ǵa balama bolatyn jańa ulttyq test ázirlenip jatqany týraly habarlanǵan bolatyn. Jobanyń quny shamamen 3 mıllıon dollardy quraıdy.

2026 jyly UBT formaty ózgerissiz qalady: test 120 suraqtan turady, eń joǵary bal – 140, al ótý ýaqyty – 4 saǵat.

Ózgerister kezeń-kezeńimen, talapkerlerge qosymsha salmaq salmaı engiziledi dep kútilýde. Bul olarǵa bilimderin ǵana emes, ony oqý men jumysta qoldanýǵa daıyndyǵyn kórsetýge múmkindik beredi.

Esterińizge sala keteıik, 11 sáýirden bastap Qazaqstanda UBT-ǵa qatysýǵa ótinimder qabyldaý bastaldy. Emtıhanǵa tirkelý 25 sáýirge deıin jalǵasady. Ótinimdi Ulttyq testileý ortalyǵynyń saıty app.testcenter.kz nemese UTO mobıldi qosymshasy arqyly berýge bolady.