InfoHub Logo

2027 jyldan bastap Qazaqstandaǵy barlyq balabaqshalar, onyń ishinde jekemenshik mekemeler da mindetti lısenzıalaýdan ótedi. Bul jańalyq jeke balabaqshalardyń jappaı jabylýyna ákele me degen alańdaýshylyq týdyrdy. Biraq, Bilim mınıstrligi bul boljamdy joqqa shyǵaryp otyr.

Bul týraly Infohub.kz aqparat agenttigi habarlaıdy.

Ne boldy?

2027 jyldan bastap barlyq balabaqshalar lısenzıa alýǵa mindetti bolady. Bul talap menshik nysanyna qaramastan, barlyq mekemelerge qatysty. Jańa erejeler boıynsha ǵımarattarǵa, pedagogter quramyna, bilim berý baǵdarlamalaryna, materıaldyq-tehnıkalyq bazaǵa jáne ınfraqurylymǵa qoıylatyn talaptar belgilendi. Buǵan qosa, 2026 jyldyń 1 aqpanynan bastap balalarǵa tamaqtandyrý, turý, bilim berý jáne saýyqtyrý qyzmetterin kórsetetin mekemelerge kenetten tekserý júrgizýge múmkindik beretin memlekettik baqylaýdyń jańa tártibi kúshine endi.

Qazaqstanda qansha jekemenshik balabaqsha bar?

Qazirgi tańda Qazaqstanda 11 909 mektepke deıingi uıym jumys isteıdi, onyń 6 526-sy jekemenshik. Bilim mınıstrliginiń málimetinshe, jekemenshik balabaqshalardyń basym kópshiligi qazirgi talaptarǵa saı keledi. Memlekettik bilim berý tapsyrysy jekemenshik mekemelerdiń 96 paıyzyna ornalastyrylǵan, bul olardyń kópshiliginiń talaptarǵa sáıkes ekenin kórsetedi.

Jekemenshik balabaqshalar jabyla ma?

Mınıstrliktegilerdiń aıtýynsha, jekemenshik mektepke deıingi uıymdardyń jappaı jabylýy týraly boljamdy rastaıtyn derekter joq. Memlekettik bilim berý tapsyrysy talaptaryna 96% sáıkes keletinin eskersek, jekemenshik balabaqshalardyń 50%-ǵa deıin jabylýy múmkin degen boljam rastalmaıdy. Tek keıbir uıymdar ǵana belgilengen talaptarǵa sáıkes kelmese, olarǵa qatysty qıyndyqtar týyndaýy yqtımal.

Lısenzıalaý qalaı júrgiziledi?

Lısenzıalaý prosesi kezeń-kezeńimen, uıymdardyń daıyndyǵy eskerile otyryp júrgiziledi. Balabaqshalar sanıtarlyq jáne órt qaýipsizdigi talaptaryna, terorıstik qaýipsizdikke, erekshe bilim qajettilikteri bar balalarǵa arnalǵan jaǵdaılarǵa, sondaı-aq qajetti materıaldyq-tehnıkalyq baza men kadrlarǵa saı bolýy tıis.

Balabaqshalar jabylǵan jaǵdaıda balalar qaıda barady?

Bul másele jergilikti ákimdikterdiń quzyretine jatady. Memleket doshkoldik bilim berý júıesin memlekettik bilim berý tapsyrysy jáne áleýmettik qoldaý sharalary arqyly qoldaýdy jalǵastyrady.