InfoHub Logo

Jetisý oblysyndaǵy Jansúgirov aýylynyń turǵyny Danıar Beısqalıdyń memlekettik gerbti qoqys úıindisinen taýyp, ony qalpyna keltirip, úıine ilip qoıǵany úshin ákimshilik jaýapkershilikke tartylyp, 50 AEK kóleminde aıyppul tólegeni týraly aqparat jelide qyzý talqyǵa tústi. Bul jaǵdaıǵa qatysty oblystyq polısıa departamenti túsinik berdi.

Buǵan deıin 37 jastaǵy azamat 2022 jyly qoqys alańynan memlekettik gerbtiń maketin taýyp alǵanyn, ony jóndep, úıine ilip qoıǵanyn aıtqan bolatyn. Alaıda, tórt jyldan keıin onyń ákimshilik quqyq buzýshylyqtar týraly kodeksiniń 458-baby boıynsha 216 250 teńge aıyppulǵa tartylǵany habarlandy. Bul áreketi memlekettik rámizderdi durys paıdalanbaý dep tanylǵan.

Bul sheshim kópshiliktiń narazylyǵyn týdyrdy. Azamat memlekettik rámizdi qoqystan taýyp, ony qalpyna keltirgeni úshin nege jazalanýy kerektigi týraly suraqtar qoıyldy. Bul jaǵdaı tipti Májilis kýlýarlarynda da talqylanyp, İshki ister mınıstriniń orynbasaryna saýal joldandy. Ol Danıar Beısqalıdyń ákimshilik jaýapkershilikke sot sheshimimen tartylǵanyn aıtty.

Shynaıy sebep: Memlekettik rámizdi qorlaý

Keıinnen Jetisý oblystyq polısıa departamenti bul jaǵdaıǵa qatysty túsinik berip, taraǵan aqparattyń durys emes ekenin jáne halyqty shatastyrýy múmkin ekenin málimdedi. Polısıanyń habarlaýynsha, azamat memlekettik rámizdi tapqany úshin jazalanbaǵan. Onyń jaýapkershilikke tartylýyna basqa da mán-jaılar sebep bolǵan.

«Memlekettik rámizdi tapqannan keıin azamat oǵan nemquraıly qaraıtynyn bildiretin áreketterge barǵan. Sonyń ishinde, oǵash qalpynda sýretke túsirip, rámizdi burmalap qoldaný elementteri bar sýretterdi jarıalaǵan. Ýákiletti organnyń usynysy boıynsha bul áreketterge quqyqtyq baǵa berildi. Qazaqstan Respýblıkasynyń qoldanystaǵy zańnamasyna sáıkes, bul memlekettik rámizderge degen qurmetsizdik, ıaǵnı ony paıdalaný tártibin buzý bolyp sanalady jáne zańda belgilengen jaýapkershilikke ákep soǵady», - dep habarlady polısıa departamenti.

Osy fakti boıynsha Danıar Beısqalı ákimshilik jaýapkershilikke tartylǵan. Óńirdegi polısıa zań aıasynda áreket etip jatqanyn jáne tek tekserilgen, resmı aqparatqa súıenýge shaqyrdy.