InfoHub Logo

Qaterli isikke qarsy Sovetonko dep atalatyn jańa preparatty qazaqstandyq ǵalym Qýanyshbek Sársenbaı jasap shyǵardy. Bul dári halyqaralyq London Rate baǵalaý kompanıasy tarapynan 160 mıllıon dollarǵa (shamamen 83 mıllıard teńge) baǵalanǵan.

Sovetonko preparaty Bern konvensıasymen qorǵalǵan 6 halyqaralyq patentke ıe. Ǵalymnyń aıtýynsha, dáriniń ǵylymı negizin 1975–1980 jyldary onyń naǵashy atasy — 2024 jyly dúnıeden ótken Sovet Dinov qalaǵan. Sol kisiniń qurmetine preparat ataýy Sovetonko dep qoıylǵan.

Zertteýge bes jylyn arnaǵan Sársenbaı 2023 jyly alǵashqy zerthanalyq synaqtardyń sátti ótkenin aıtady. Preparat leıkemıa, asqazan qaterli isigi, jatyr moıny obyry, Berkıtt lımfomasy syndy aýyr dertterge qarsy joǵary nátıje kórsetken. Keıbir synaqtarda tıimdiligi 100 paıyzǵa jetken.

Alaıda ǵalym bul jobaǵa Qazaqstanda memlekettik qoldaý bolmaǵanyn, bastapqyda tek jeke ınvestorlardyń kómegimen jumys istegenin aıtty. Qazir dárini tolyq satyp alýǵa birneshe sheteldik farmasevtıkalyq kompanıa qyzyǵýshylyq tanytýda. Al otandyq taraptardan ázirge naqty qoldaý ne usynys joq.

Qýanyshbek Sársenbaı bul ǵylymı jetistik Qazaqstan medısınasyn jańa deńgeıge kóterýge múmkindik beretinin aıtyp otyr. Alaıda ǵylym men ınovasıaǵa salqyn kózqaras mundaı jobalardyń shetelge ketý qaýpin kúsheıtip tur.