InfoHub Logo

Qazaqstandyq shańǵyshy Sergeı Apenko "Shymbulaq" taý shańǵy kýrortynda áýesqoılar arasynda shańǵymen syrǵanaýdan rekord ornatyp, birden úsh ret marapattaldy. Onyń kórsetkishi Qazaqstan, Azıa jáne Afrıka qurlyqtarynyń rekordtaryna endi.

Bul týraly Infohub.kz aqparat agenttigi habarlaıdy.

Atalǵan rekord 2026 jyldyń 23 aqpanynda Qazaqstan rekordy kitabyna engizildi. Sergeı Apenkonyń jyldamdyǵy saǵatyna 160,953 shaqyrymǵa jetti. Bul kórsetkish "Global Best of Records" halyqaralyq uıymy tarapynan Azıa jáne Afrıka qurlyqtarynyń áýesqoı shańǵyshylar arasyndaǵy jyldamdyq boıynsha rekordy retinde resmı túrde tirkeldi.

Rekordty tirkeý rásimi

Rekordty tirkeý rásimi Almaty qalasynda ótti. "Global Best of Records" uıymynyń resmı málimetinshe, bul jetistik áýesqoı sporttyń erekshe áleýetin jáne adam múmkindikteriniń shegin keńeıtetin sportshylardyń batyldyǵyn kórsetedi.

Jyldamdyqty ólsheý úshin FIS (Halyqaralyq shańǵy jáne snoýbord federasıasy) standarttaryna sáıkes keletin ALGE Timing kásibı hronometraj júıesi qoldanyldy. Rekordty tirkeý komısıasy úsh táýelsiz músheden quraldy.

Sportshynyń aıtqany

Sergeı Apenko bul rekordty tek sporttyq jarys retinde ǵana emes, sonymen qatar elimizdegi taý shańǵy klasterin damytýǵa baǵyttalǵan sımvoldyq qadam dep sanaıdy. "Shymbulaq" trassalarynyń áleýetin kórsetý úshin osy taý shańǵy kýrortynda jarys ótkizý mańyzdy boldy. Bul joba buqaralyq sportty nasıhattaýǵa jáne Qazaqstannyń qysqy týrızm ortalyǵy retindegi ımıjin nyǵaıtýǵa kómektesedi dep úmittenemin", - dedi Apenko.

"Shymbulaq" taý shańǵy kýrortynyń baspasóz qyzmeti habarlaǵandaı, jarysty uıymdastyrý kezinde qaýipsizdik talaptaryna basa nazar aýdarylǵan.