InfoHub Logo

Qazaqstan úkimeti ótken jyldyń qazan aıynda komýnaldyq qyzmetterge tarıfterdi kóterýge moratorıı jarıalaǵan bolatyn. Bul shekteý bıylǵy jyldyń ekinshi toqsanynda, ıaǵnı 1 sáýirde aıaqtalady. Osyǵan baılanysty, halyq arasynda elektr energıasy, jylý jáne sý baǵasynyń kóterilýi múmkin degen alańdaýshylyq týyndady.

Bul týraly Infohub.kz aqparat agenttigi habarlaıdy.

Tarıfterdi retteý máselesi

Tarıfterdiń ózgerýine qatysty máselelerdi Qazaqstan Respýblıkasy Ulttyq ekonomıka mınıstrliginiń Tabıǵı monopolıalardy retteý komıteti (KREM) qaraıdy. Komıtetten habarlaǵandaı, tarıfterdi ózgertý qajettilik týyndaǵan jaǵdaıda qarastyrylady. Árbir tabıǵı monopolıa sýbektisi boıynsha ózgerister jeke-jeke taldanyp, olardyń shyǵyndaryn rastaıtyn, ekonomıkalyq negizdelgen ótinimderi men sebepteri eskeriledi.

Tarıfterdiń ózgerý dınamıkasy, ótinimderdiń mazmunyna, ınfraqurylymnyń jaı-kúıine, sondaı-aq óńirlerdegi áleýmettik-ekonomıkalyq jaǵdaıǵa baılanysty bolady. Sonymen qatar, úkimet bekitken ınflásıalyq dáliz sheginde tarıfterdiń ósýine jol beriledi. Bıylǵy jyly bul kórsetkish 9-12 paıyz aralyǵynda bolady dep kútilýde.

Tarıfterdiń qalyptasýyna áser etetin faktorlar

Komýnaldyq qyzmetterge arnalǵan tarıfter birneshe faktorǵa baılanysty qalyptasady. Olarǵa janar-jaǵarmaı, gaz jáne elektr energıasy baǵasynyń ósýi, materıaldar men qyzmetterdiń qymbattaýy, salyqtar, tutynýshylar sany jáne kórsetiletin qyzmet kólemi jatady. Sondaı-aq, jelilerdiń tozýy, olardy jóndeý men jańǵyrtýǵa ketetin shyǵyndar, jalaqynyń ósýi jáne elektr energıasy men gaz baǵasynyń joǵarylaýy da eskeriledi.

Tarıfterdi kóterý týraly sheshimdi komýnaldyq kásiporyndardyń ótinimi negizinde ýákiletti organ qabyldaıdy. Bul rette ınfraqurylymnyń jaı-kúıi, óńirdegi áleýmettik-ekonomıkalyq ahýal jáne ınflásıalyq dáliz esepke alynady. Tarıfke tek negizdelgen jáne rastalǵan shyǵyndar ǵana kiredi.

Buǵan deıin Energetıka vıse-mınıstri Suńǵat Esimhanov 1 sáýirden bastap komýnaldyq qyzmetterge tarıfterdiń qalaı ósetini týraly suraqqa jaýap bergende, bul máseleniń áli talqylanyp jatqanyn jáne «ázirge naqty sheshim joq» ekenin aıtqan bolatyn.