InfoHub Logo

Sońǵy kezderi áleýmettik jelilerde Qazaqstan turǵyndarynyń jańadan alǵan nemese shetelden ákelgen smartfondarynyń tirkelmeı, «kirpishke» aınalyp jatqany týraly shaǵymdar kóbeıdi. Bul jaǵdaı kópshilikti alańdatyp otyr.

Bul týraly Infohub.kz aqparat agenttigi habarlaıdy.

Ne boldy?

Áleýmettik jelilerdegi jazbalarǵa súıensek, Reseı, Qyrǵyzstan jáne Ózbekstannan ákelingen telefondardy tirkeý múmkin bolmaı qalǵan. Tipti birneshe jyl buryn satyp alynǵan qurylǵylardyń da IMEI kodtary qabyldanbaıtyny aıtylýda. Bul jaǵdaıdy paıdalanyp, deldaldar máseleni 30-50 myń teńgege sheship berýdi usynyp úlgergen.

Operatordyń jaýaby

ATS Mediafon derekter bazasynyń operatory bul jaǵdaıǵa qatysty óz pikirin bildirdi. Kompanıa ókilderiniń aıtýynsha, shý kóbine «sur» jolmen jumys isteýge daǵdylanǵandar tarapynan bolyp otyr. Olardyń aıtýynsha, zań talaptaryn buzbaı, resmı túrde ákelingen jáne tıisti tólemderi jasalǵan qurylǵylar eshqandaı qıyndyqsyz tirkeledi.

Nege tirkeýden bas tartady?

Eń jıi kezdesetin sebep – «sur» ımport. Bul qujatsyz jáne salyqsyz elge ákelingen smartfondar. Mundaı jaǵdaıda júıe qurylǵyny zańdy aınalymda kórmeıdi, sondyqtan IMEI kody tekserýden ótpeıdi. Telefonnyń qaı elden ákelingeni emes, onyń zańdy túrde elge kirgizilgeni jáne tıisti qujattarynyń bar-joǵy mańyzdy.

Tirkeý úshin aqy tóleý qajet pe?

Kompanıa qarapaıym paıdalanýshylar úshin tekserýdiń áli de tegin ekenin atap ótti. Áleýmettik jelilerde aıtylyp júrgen 2 AEK mólsherindegi tólem azamattarǵa qatysty emes. Importtaýshylar men resmı dıstrıbútorlardyń verıfıkasıa qyzmetterin kórsetý týraly komersıalyq kelisimsharttary bar, biraq bul tólemniń ózi rásimdeýdiń ótýine kepildik bermeıdi. Zańdy túrde ákelingenin jáne salyqtar men keden tólemderiniń tólengenin rastaý mindetti shart bolyp qala beredi.

Telefondy resmı satýshylardan alǵan jaǵdaıda, ádette, verıfıkasıada eshqandaı qıyndyq týyndamaıdy. Al resmı emes satýshylardan satyp alǵanda, qurylǵynyń zańdylyǵyna qatysty táýekelderdi satyp alýshy ózi qabyldaıdy. Sondyqtan óz qaýipsizdigińiz úshin uıaly qurylǵylardy tek resmı satý oryndarynan satyp alý usynylady.