InfoHub Logo

Erteden keń dalanyń qoınaýynda meken etken beıbit halqymyz qaı zamanda bolmasyn kózi ashyq, kókiregi oıaý bolǵan. Zaman ózgerisinen qalmaı, basqa alpaýytty eldermen terezesin teń ustaýǵa tyrysqan. Kóz ilespes jyldamdyqpen ózgerip jatqan zamanda, ulttyq qundylyqtarymyzdy saqtap qalý, ony násıhattaý aldymyzda turǵan úlken mindetterdiń biri. Tuńǵysh Elbasymyz Nursultan Ábishuly Nazarbaevtyń «Bolashaqqa baǵdar: rýhanı jańǵyrý» atty maqalasy qazirgi qoǵam damýyna jańa serpin ákelgen bolatyn. Maqalada  básekege qabilettilik baǵytyn basa kóterdi. Al basekege qabiletti jastar – QazUÝ jastary desek qatelespeımiz. Bulaı aıtýymyzdyń birden-bir sebebi QazUÝ elimizdegi joǵary bilim berý júıesinde ózindik aınymas oryn alǵan, zaman talabyna saı bilikti, bilimdi mamandar daıarlaıtyn oqý orny. Búginde kóptegen halyqaralyq ýnıversıtettermen seriktes, elimizdegi joǵary oqý oryndary arasynda aldyńǵy qatarly, kóshbasshy orynǵa ıe.

Talaı túlek armanyna aınalǵan bul ýnıversıtettiń tarıhy óte tereńde. Ýnıversıtet óziniń  negizin 1934 jyly 15 qańtarda qalanǵannan bastap, Qazaqstandaǵy bilim berý júıesiniń kóshbasshysy, kásibı bilim men tárbıeniń qaınar kózi boldy. Sonymen qatar QazUÝ qabyrǵasynda Q.I Satbaev, M.O Áýezov, E.B Bekmahanov,  Á.H Marǵulan,  D.V Sokolskıı tárizdi asa kórnekti ǵylym men mádenıet qaıratkerleri dáris oqyǵan. Ál-Farabı atyndaǵy Qazaq Ulttyq Ýnıversıteti 180-nen astam gýmanıtarlyq, jaratylystaný, tehnıkalyq mamandyqtar boıynsha bakalavrlardy, magıstranttardy, doktoranttardy daıyndaıdy. Ýnıversıtet bilim alýshy stýdenttiń jan-jaqty damýyna, ózin-ózi kemeldenýine qajetti jaǵdaı jasaý úshin bar kúsh jigerin salyp, stýdenttik ózin-ózi basqarýǵa, kóshbasshylyq qasıetterdi damytýǵa, tárbıeleýge jol ashady.

Tuńǵysh Elbasymyz N.Á. Nazarbaev bir sózinde «Zamanaýı álemde eldiń qýaty eń aldymen azamattarynyń bilimimen ólshenedi. Sol bilimdi ájetke, turmys ıgiligine jarata bilýimen baǵalanady» degen bolatyn. Qazirgi tańda ýnıversıtet kóptegen jetistikterge jetti. Atap aıtqanda jahandyq eń tanymal jáne bedeldi QS halyqaralyq reıtinginde  QazUÝ álemniń 800 úzdik ýnıversıteti arasynda 165 -oryndy ıelendi jáne de QR ulttyq reıtingisinde ál-Farabı atyndaǵy QazUÝ birinshi orynǵa ıe bolyp otyr.

QazUÝ-daǵy eń qasıetti meken – kitaphana. Bul kitaphana Qazaqstanda ǵana emes Orta Azıadaǵy joǵarǵy oqý oryndary arasyndaǵy eń úlken kitap qoryna ıe. Jyl saıyn ár mamandyqqa saı ýnıversıtet kitaphanasyna memleket tarapynan arnaıy jańa kitaptar bólinip otyrady, jáne kitap qory 50-60 myńǵa artyp otyrady. Sondaı-aq qazirgi qashyqtyqtan oqytýda elektrondy kitaphana óz jumysyn joǵary deńgeıde atqarýda. Bilim ordasynyń alǵashqy irge tasyn tuńǵysh Elbasymyz N.Á. Nazarbaev qalaǵan bolatyn. Onyń ashylý saltanaty 2013 jyldyń naýryz aıynda ótti.

Rasynda da QazUÝ – naǵyz bolashaq azamattar men azamatshalar daıyndaıtyn úlken joǵary oqý orny. Búgingi jas urpaq - erteńgi el erteńi. QazUÝ stýdentteri – elimizdiń bolashaǵy,  naǵyz ultjandy,  jalyndaǵan jastar. Sol sebepten de QazUÝ bolashaqta da elimizdegi máni men mańyzy asa joǵary oqý orny bolyp qala beretinine senimimiz mol.

 

Ál-Farabı atyndaǵy Qazaq ulttyq ýnıversıteti «Jalpy til bilimi jáne eýropa tilderi» kafedrasynyń aǵa oqytýshysy, PhD doktory A.M. Dosanova

Ál-Farabı atyndaǵy Qazaq ulttyq ýnıversıteti «Shetel tili: eki shet tili» mamandyǵynyń 1-kýrs magıstranty A.K. Ábýbákir

---