InfoHub Logo

Qorqyt Ata atyndaǵy Qyzylorda memlekettik ýnıversıteti bazasynda "Maıkrosoft akademıasy" men ınovasıalyq ınjınırıń ortalyǵy ashylady.

Bul týraly QR Úkimetinde ótken baspasóz máslıhatynda Qyzylorda oblysynyń ákimi Qyrymbek Kósherbaev málimdedi.

«Sáýir aıynda Microsoft kompanıasymen yntymaqtastyq týraly memorandým bekittik jáne shilde aıynan bastap, onlaın-oqytý arqyly zamanaýı ınjenerlik-kompúterlik tehnologıalardy qoldanatyn biliktiligi joǵary mamandardy daıyndaýdy bastadyq.  Birlesken ǵylymı-zertteý jáne tájirıbelik-eksperımenttik jumystardy júrgizý úshin Qorqyt Ata atyndaǵy Qyzylorda memlekettik ýnıversıteti bazasynda "Maıkrosoft akademıasyn" qurý týraly ýaǵdalastyq", - dedi óńir basshysy.

 Ákimniń aıtýynsha,  qazirgi ýaqytta oblysta Machine-Learning tehnologıasy arqyly kúrish alqabynyń shyǵymyn boljap, sý tasqyny jaǵdaılaryn modeldeý baǵyttary qolǵa alyndy. Machine-Learning - álemde keńinen qoldanylatyn Microsoft kompanıasynyń ónimi.

"Odan bólek, EKSPO aýmaǵyn qoldana otyryp, Máskeý bolat jáne qorytpalar ınstıtýtymen Qyzylordada mashına qurastyrý, 3-D prınteriniń kómegimen túıinder men detaldar óndirýge baǵyttalǵan máskeýlik ǵylymı-zertteý ınjınırıń ortalyǵynyń balamasyn qurý jóninde kelissózder júrgizdik», - dep tolyqtyrdy Q. Kósherbaev.

---