InfoHub Logo

Qorǵanys mınıstrliginiń baspasóz qyzmeti Almatydaǵy Baýyrjan Momyshuly atyndaǵy áskerı-sport kolejine Qaırat Satybaldyulynyń barýyna qatysty aqparatqa túsinik berdi. Buǵan deıin BAQ-ta ol stýdentterge dáris oqydy degen aqparat taraǵan bolatyn.

Bul týraly Infohub.kz aqparat agenttigi habarlaıdy.

Mınıstrlik ókiliniń jaýaby

Májilis kýlýarynda jýrnalıser Qorǵanys mınıstriniń orynbasary Darhan Ahmedıevten osy jaǵdaıǵa qatysty pikir surady. Ol Satybaldyulynyń kolejge dáris oqý úshin emes, 40 jyldyq mereıtoıyna arnalǵan sharaǵa túlek retinde kelgenin aıtty.

«Kolejde 40 jyldyq mereıtoı boldy. Bul sharany túlekter uıymdastyrdy. Mınıstrliktiń buǵan eshqandaı qatysy joq. Olar ózderi mundaı mereıtoılardy ótkizedi. Ol bul oqý ornynyń túlegi retinde bardy. Ol dáris oqydy degendi birinshi ret estip turmyn. Dáris oqyǵan joq, oqymaıdy da. Dáris oqý úshin oqytýshylar quramynda bolý kerek», - dedi vıse-mınıstr.

Kolej basshylary jazalandy

Jýrnalıser bul jaǵdaıǵa baılanysty Qorǵanys mınıstrliginiń kolej basshylyǵyna qandaı shara qoldanatynyn suraǵanda, Ahmedıev «Jaza qoldanyldy. Eger qatelespesem, jumystan bosatyldy», - dep jaýap berdi.

Ahmedıev Satybaldyulynyń kolejge barýyna baılanysty qandaı basshynyń qyzmetinen alynǵanyn naqtylamady.

Qaırat Satybaldyuly kim?

Qaırat Satybaldyuly – Qazaqstannyń eks-prezıdenti Nursultan Nazarbaevtyń jıeni. 2022 jyly ol 6 jylǵa bas bostandyǵynan aıyrylǵan bolatyn. Tergeý málimetteri boıynsha, ol «Qazaqtelekomǵa» 12 mıllıard teńgeden astam shyǵyn keltirgen jáne Kólik qyzmetteri ortalyǵynyń múlkin jymqyrýmen baılanysy bar.

2023 jyly tergeý basqa epızodtar boıynsha jalǵasty. Qańtar aıynda Satybaldyuly aqshany jylystatý faktisin moıyndady. Osydan keıin 2024 jyly Kaisar Plaza bıznes ortalyǵy onyń memleketke qaıtarǵan aktıvteriniń tizimine endi.

Osy tergeýlerden keıin Qaırat Satybaldyulynan kóptegen iri aktıvter tárkilenip, memleketke berildi. Olardyń jalpy quny 730 mıllıard teńgeden asqan.