InfoHub Logo

— Ata, ata, anań qara! Qarlyǵa-ash!

Atasynyń janynda saıajaıda júrgen Aldan jerden jeti qoıan tapqandaı máz. Daýysynyń qatty shyǵyp ketkenin de baıqamaı qalǵan. Rasynda, bul bıyl  jazǵyturymǵy kórgen alǵashqy qarlyǵashtary edi.

— Tynysh, balam, qatty daýystama. Shoshytyp, úrkitip alasyń. Kel odan da qozǵalmaı otyryp, olardyń áreketin baqylaıyq,— dep Orman qart nemeresin qasyna shaqyryp, ózderi sýǵaryp júrgen taqtanyń jıegindegi kókmaısaǵa jaıǵasty.

Alǵashynda Aldannyń qattyraq shyqqan úninen jasqanshaqtap, keri serpilgen qos qarlyǵash sálden soń qalyqtaı kelip, bulardyń aldyndaǵy sýǵarylyp jatqan taqtaǵa qaıta oraldy.

— Sý izdep júrgen bolar? — Sybyrlaı sóılegen nemeresi atasyna suraýly keıippen qaraǵan.

— Ts-ss, asyqpa, balam. Qazir kóremiz.

Qalyqtaı kelip tekshelengen taqta ústine qonǵan olar aldymen tip-tıtteı súıir tumsyqtaryna ilip jerden bir-bir tal shóp qıyndysyn aldy. Eki-úsh kún buryn shabylǵan shóptiń qýraı bastaǵan qaldyǵy. Tistegen álgi shópterin endi beti dymqyldanǵan topyraqqa ary-beri úıkep alǵan qos qarlyǵash jerden lyp kóterilip áldeqaıda asyǵa ushyp ketti.

— Sý izdese, batpaqta neleri bar, ata? Qarlyǵash ta shóp jeı me?— degen Aldan ań-tań.

— Úndeme,— dedi atasy áli de bolsa, sybyrlaı sóılep. — Olar jaqyn mańǵa uıa salǵaly júr. Qazir taǵy oralady.

Atasy aıtyp bolǵansha zýyldaı kelip, taqta ústine qonǵan qos qarlyǵash týra jańaǵy áreketterin qaıtalaı, tumsyqtaryna bir-bir tal shópti ilgen boıda taǵy da usha jóneldi. Ózderi tym asyǵys, jumystary qaýyrt sekildi.

— Shópti qaıtedi? Ony nege batpaqqa batyryp, bylǵap jatyr?

Nemeresiniń saýalyna eriksiz myrs etken atasy:

— Qulynym-aý, byltyr aýylǵa, Sálim aǵaıyńnyń úıine barǵanda qora jaqtaýyna  salynǵan qarlyǵashtyń uıasyn kórip ediń ǵoı, esińde me?— dedi.

— Árıne, esimde. Tumsyqtaryn soza, aýyzdaryn ashyp, tamaq surap shıqyldap jatqan balapandaryn da, eneleriniń olarǵa qalaı tamaq ákelip beretinderin de kórdik qoı.

— Endeshe, mine, myna qos qarlyǵash ta ózderine dáp sondaı uıa salýǵa kirisip júr. Jańaǵy balshyqqa  shylanǵan shı shópke attyń qylyn  nemese jún-jurqa aralastyryp, uıa qabyrǵasyn qıýlastyra qalap shyǵady. Tup-týra kirpish qalaýshy qurylysshylardaı.

— Bulardyń burynǵy úıleri qaıda myqty, berik bolsa?..— dedi Aldan tynymsyz qarbalasqan qos qarlyǵashqa kómekke asyqqan syńaımen.

— Baıqaımysyń, bular bıyl ǵana tabysqan jup  sekildi. Seniń Arman aǵaıyń men Gúlim jeńesheń sıaqty. Olar da jańa otaý quryp, jańa úı salyp jatqan joq pa?— dep, Orman qart nemeresine túsinikti bolý úshin naqty mysalmen sóıleýge tyrysyp baǵýda.

— Qarlyǵash ta adam sekildi bolǵany ǵoı sonda?..

— Árıne, barlyq tirshilik ıesi adamǵa uqsas tirlik keshedi. Jáne olar adamdardan demeý kútedi. Onyń ishinde, ásirese, qarlyǵash adamǵa óte jaqyn. Ózderi men balapandaryn jaýlarynan qorǵaý úshin uıalaryn adamdarǵa jaqyn jerge, úılerdiń mańdaıshalary men buryshtaryna salady. Eń janashyr qamqorshylarynyń adam ekenin jaqsy túısinedi,— dep toqtaǵan atasy kúregin alyp, nemeresin jetektep, úıge qaraı bet alǵan.— Júr, qulynym, qarlyǵashtardyń jumystaryna kedergi bolmaıyq. Kerekterin jasqanbaı, emin-erkin tasyp alsyn.

Osylaı istese, qarlyǵashtarǵa kómegi kóbirek tıerin túsingen Aldan da ornynan turyp,  tynymsyz qaıshylasqan qos qarlyǵashqa qyzyqtaı qaraǵan kúıi atasyna erdi.

---