InfoHub Logo

QR Bilim jáne ǵylym vıse-mınıstri Mıras Dáýlenov tótenshe jaǵdaıda stýdentterdiń emtıhan men dıplomdyq jumysty qalaı tapsyratynyn túsindirdi.

«Aralyq atestat degenimiz - birinshi, ekinshi jáne úshinshi kýrs nátıjeleri boıynsha júrgiziletin synaqtar. Bul ekzamender mamyr aıynda júrgiziletindikten, oǵan deıin karantın aıaqtalýy múmkin. Al eger karantın sharalary toqtamasa, emtıhandy qashyqtan tapsyrýǵa týra keledi. Qalalarda turatyn stýdentter synaqty qashyqtan tapsyrýy tıis. Al Interneti joq shalǵaı eldimekenderde turatyn stýdentter arnaıy ótinishpen synaqty keıinge qaldyrady. Menińshe, stýdent úshin synaqty keıinge qaldyrý - eń durys sheshim», - dedi vıse-mınıstr Facebook jelisinde ótken onlaın konferensıada.

Al qorytyndy attestasıa - JOO túleginiń qandaı nátıjege qol jetkizgenin kórsetedi jáne bul memlekettik bilim berý standartynda negizdelgen saıasat. Qorytyndy attestasıa eki bólimnen turady, onyń alǵashqysy - dıplom jumysyn qorǵaý. «Dıplom jumysyn qorǵaýdy mindetti túrde qaldyramyz, sebebi qashyqtan oqytý rejımi 16 naýryzda engizildi. Al dıplomdy aldyn ala qorǵaý jumystary aqpan, naýryz aılarynda ótti. Zańsyz ıemdenýge qarsy kúrestiń eń iri úsh júıesi arqyly qorǵaýdyń jańa talaptaryn jazdyq. Iaǵnı, stýdentter antıplagıat júıesine dıplomdyq jumystaryn engizedi, al oqytýshylar men memlekettik komısıa músheleri olardy tekseredi. Eger stýdent antıplagıat júıesi arqyly ǵylymı jumysyn kórsetse, onlaın tanystyrylym jasap, suraqtarǵa jaýap beredi jáne osylaısha dıplomdyq jumysyn qorǵaıdy», - deıdi M. Dáýlenov.

Al eger stýdenttiń onlaın qorǵap shyǵatyn múmkindigi bolmasa, suraqtar hat túrinde kez kelgen baılanys quraly arqyly jiberiledi.

«Keshendi ekzamenge kelsek, áriptester ony jazbasha túrde júrgizýdi usynyp otyr. Jınalysta barlyq JOO-lar estıhandy ádil tapsyratyn júıemen qamtamasyz etetinin aıtty. Menińshe, osy nusqa qolaıly bolady. Qazirgi ýaqytta JOO-lardyń keshendi emtıhan ótkizý formatyn túrlendirýge daıyn ekenin kórip otyrmyz. Bul jaǵdaıda biz Bilim mınıstrligi retinde 2018 jyly berilgen akademıalyq erkindik pen akademıalyq saıasatqa júginýdi usynamyz. Árıne, karantın rejımi jalǵassa, onlaın-ekzamenge kóshýge týra keledi. Biraq munda stýdenttiń buǵan deıingi baǵalarynyń jıyntyǵyn qoldanýǵa da bolady», - dedi M. Dáýlenov.

Vıse-mınıstr baǵalaý quraly boıynsha sońǵy sheshimdi JOO qabyldaıtynyn aıtty.

«Odan bólek, qorytyndy attestasıa men ekzamenderdi jazǵy maýsymǵa qaldyrý máselesi de nazarǵa alyndy. Bul máselede bizdiń taraptan esh shekteý joq. Iaǵnı, mınıstrlik beretin memlekettik úlgidegi dıplom barlyq JOO-ǵa beriledi. Al ony stýdentterge qashan beretinderińizdi mınıstrlik sheshpeıdi. Buǵan qatysty joǵarǵy oqý oryndary stýdentter múddesin eskere otyryp, derbes sheshim qabyldaıdy», - dedi Mıras Dáýlenov.

---