InfoHub Logo

Búgin Qazaqstan Respýblıkasynyń Memlekettik hatshysy Gúlshara Ábdiqalyqova Qazaqstan Respýblıkasy Táýelsizdiginiń 25 jyldyǵy aıasynda Nazarbaev Ýnıversıtetinde ótken «Zıatker Qazaqstan» atty dóńgelek ústel jumysyna qatysty.

Dóńgelek ústel jumysyna memlekettik organdardyń ókilderi, qazaqstandyq jáne sheteldik tanymal ǵalymdar, joǵary oqý oryndary men ǵylymı uıymdardyń basshylary, ǵylym salasyndaǵy qazaqstandyq sarapshylar qatysty.

Memlekettik hatshy óz sózinde Qazaqstan Respýblıkasynyń Prezıdenti N.Á.Nazarbaevtyń otandyq ǵylymnyń áleýetin ósirýge aıryqsha mán beretindigin atap ótti. «Qazaqstan-2050» Strategıasynda belgilengen mindetter ekonomıkanyń ǵylymdy qajet etetin salalaryn qurýmen baılanysty. Jańa tehnologıalyq deńgeıge shyǵý úshin ekonomıkanyń árbir salasy ınovasıalyq qadamdardy qajet etedi.

         G. Ábdiqalyqova Memleket basshysynyń «bilimniń úsh buryshy» - bilim, zertteý jáne ınovasıa ekonomıkanyń ǵylymdy qajet etetin salalaryn damytýda negizgi ról atqaratynyn udaıy toqtalatynyn atap ótti. Memlekettik hatshy búkil álemde jahandyq básekelestikti quraıtyn joǵary bilikti mamandarǵa jáne ǵylymı zertteýlerdiń nátıjelerine, jańa tehnologıalarǵa degen suranystyń bar ekenine basa nazar aýdardy.

Memlekettik hatshy 2010 jyldan bastap Qazaqstannyń Jahandyq básekege qabylettilik  ındeksi boıynsha óz pozısıasyn jaqsartqanyn aıtty. Aıtalyq, 2015 jyly «Inovasıalyq áleýet» kórsetkishi boıynsha 31 pozısıaǵa (140 eldiń ishinde 112 orynnan 81 orynǵa), ǵylymı-zertteý uıymdarynyń sapasy boıynsha ınovasıada 29 pozısıaǵa (140 eldiń ishinde 101 orynnan 72 orynǵa), ǵalymdar men ınjenerlerge qoljetimdilik kórsetkishi boıynsha 21 pozısıaǵa (140 eldiń ishinde 91 orynnan 70 orynǵa) kóterilgendigi atalady.

Dóńgelek ústel barysynda úsh paneldik sesıa ótti, onda otandyq ǵylymdy odan  ári damytý jáne qazaqstandyq ǵalymdardyń ǵylymı izdenisterin ilgeriletýdiń ózekti máseleleri jan-jaqty talqylandy.

Memlekettik hatshy zertteýdiń ishki resýrstaryn damytýdyń mańyzdylyǵyna,  shet elden ǵalymdardy, sonyń ishinde shet elde ǵylymı jumystarymen tanymal qazaqstandyq ǵalymdardy belsendi tartý qajettiligine erekshe nazar aýdardy.

Búginde Qazaqstanda ǵylymdy qajet etetin ekonomıkany qalyptastyrý úshin eki zıatkerlik-ınnovasıalyq klaster - haıtek-park Nazarbaev ýnıversıtetindegi «Astana bıznes kampýs» jáne Almatyda «Alataý» tehnoparki  quryldy. Naqty óndiristik jobalardy iske asyrý úshin klasterler bazasynda joǵary tehnologıalyq kompanıalar, sonyń ishinde sheteldik kompanıalar tartylatyn bolady.

Dóńgelek ústel qorytyndysy boıynsha Qazaqstan Respýblıkasynyń Memlekettik hatshysy G.N.Ábdiqalyqova memlekettik organdarǵa qazaqstandyq ǵylymdy odan ári damytý boıynsha birqatar naqty tapsyrmalar berdi. 

---