InfoHub Logo

Ózin-ózi taný páni muǵalimi Mýstafına Gýlmıra Kýanyshevna

Ózin ózi taný 7 synyp
Taqyryp: Qudiretti Jer - Ana
Maqsaty: oqýshylardyń jer qundylyǵy týraly bilimderin keńeıtý.

Mindetteri:
- oqýshylarǵa jer men adamzattyń ózara qarym - qatynasy jáne onyń nátıjeleri týraly bilim berý;
- jerdiń qundylyq retindegi mánin túsinip, sezine bilýlerin damytý;
- jerdi súıýge, qadirlep - qasterleýge tárbıeleý.
Kórnekilikter: fotosýretter, úntaspa.

Shattyq sheńberi:
Muǵalimniń basshylyǵymen oqýshylar sheńberge jınalyp, bir - birimen sálemdesedi. Balalar qosylyp «Jer - ana» ánin aıtady.

Áńgimelesý:
Áńgimelesýdiń maqsaty - oqýshylardy Jerge ana retinde qarap, óz anasyndaı tildese bilýge, ony túsine bilýge baýlý. Osy maqsatta oqýlyqta tómendegideı suraqtar berilgen:
Jermen syrlasa bilesiń be?
Eger sóılesken bolsań, ne aıtar ediń?
Jerdi Ana dep sezingen kezderiń boldy ma?
Áńgimelesý ádistemelik tásilinde oqýshylardyń shyǵarmashylyqpen oılaý deńgeıin baıqaýǵa múmkindik beredi.
Sońynan muǵalim oqýshylardyń oılaryn tıanaqtap, qorytyndylaıdy.

Sahnalaý:
«Oqý aqparaty» úshin berilgen Sh. Aımatovtyń «Ana - Jer - ana» povesi boıynsha jazylǵan Q.Muhametjanovtyń pesasyn rólge bólip oqý usynylady.
Tolǵanaı ana nelikten Jer - anamen syrlasady dep oılaısyńdar?
Jer Tolǵanaıdy qalaı jubatty?
Jer - ana nelikten adamdy bárinen de ústem sanaıdy?
Jermen syrlasqyń kele me? Onda ne aıtar ediń?

Dáıeksóz:
Muǵalim oqýlyqtaǵy dáıeksóz aıdarymen berilgen «Jer - ana jomart ana ter tókkenge» degen naqyl sózdiń beretin maǵynasy týraly oılanýǵa oqýshylardy tarta otyryp, olardyń ózindik kózqarasyn tolyqtaı aıtyp shyǵýǵa múmkindik beredi.

Júrekten júrekke:
Muǵalim oqýshylardy sheńberge shaqyrady. Oqýshylar «Babam ósken jer» ánin aýdıokassetadan tyńdap, birge qosylyp aıtady.