InfoHub Logo

 Ótken ǵasyrda oryn alǵan zulmat zamanda qazaqtyń bas kóterer zıaly qaýymynyń kópshiligi qýǵyn-súrgin qurbanyna aınaldy. Qazaq halqynyń basynan ótpegen zulmat kemde-kem. Jýyrda óner akademıasynda saıası qýǵyn-súrgin jáne asharshylyq qurbandaryn eske alyp, jazyqsyz japa shekken qoǵam qaıratkeri T.Q.Júrgenovtiń eskertkishi aldynda gúl shoǵyn qoıý (mıtıń) rásimi ótti.

Sharaǵa qýǵynǵa ushyraǵan azamattardyń urpaqtary, ardagerler, eńbek ujymdary men qoǵamdyq jáne saıası birlestikterdiń ókilderi qatysyp, qýǵyn-súrgin qurbandaryn bir mınýt únsizdikpen eske aldy. Eskertkish aldynda Birqatar zıaly qaýym ókilderi, «Temirbek Qarauly Júrgenov» qoǵamdyq qorynyń ókilderi, akademıa  ustazdar qaýymy men stýdentteri jazyqsyz japa shekkenderdiń rýhyna taǵzym etti. 

Elbasy óziniń «Bolashaqqa baǵdar: rýhanı jańǵyrý» atty maqalasynda «Týǵan jer» baǵdarlamasyn qolǵa alý týraly sóz qozǵaǵan bolatyn. Onda «Árbir ólkeniń halqyna sýyqta pana, ystyqta saıa bolǵan, esimderi el esinde saqtalǵan birtýar perzentteri bar. Osynyń bárin jas urpaq bilip ósýge tıis» dep, atap kórsetti. Elbasynyń bul sózi bir ǵana jyldyń enshisindegi másele emes. Bul únemi atqaryla beretin izgi boryshymyz. Osy shara aıasynda mádenıet pen ádebıet salasynyń órkendeýine ólsheýsiz úles qosqan kórnekti memleket jáne qoǵam qaıratkeri Temirbek Qarauly Júrgenovtyń týǵanyna 120 jyl tolýyna baılanysty aqyndar arasynda respýblıka kóleminde jazba aqyndar músháırasyn jáne prozaıkter arasynda ádebı baıqaý Memlekettik tildiń qoldanylý aıasyn keńeıtý, til mádenıetin kóterý, kórkem ádebıetti nasıhattaý, maqsatynda ótkizildi. 

Temirbek Júrgenovtyń saıası kózqarastaryn, oqý-aǵartý jáne mádenıet salasyndaǵy jumystaryn, ádebı, pýblısısıkalyq murasyn ádebı týyndy men óleń arqyly urpaqqa nasıhattaý boldy. Kıeli poezıa jáne proza áleminde ózindik ún, ózindik syr, ózindik boıaý, ajary bar, sezim men syrǵa toly óleńderimen oqyrman qaýymyn eleń etkizip, jyrmen terbep júrgen hám esimi respýblıkaǵa tanymal daryndy aqyn jazýshylarymyz  Temirbek Júrgenovtiń jazbalarynda kezdesetin rýhanı ulttyq muramyz ben eldik-erlik qundylyqtaryn bir sát ulyqtady. Onyń repressıa qurbany bolǵanyn óleńge qosý arqyly, qazaq halqynyń basyna náýbet bop tóngen jyldardy urpaq sanasyna jańǵyrtty.

«Temirbek Qarauly Júrgenov» qoǵamdyq qory, Temirbek Júrgenov atyndaǵy Qazaq ulttyq óner akademıasymen birlese otyryp uıymdastyrylǵan Respýblıkalyq prozaıkter ádebı baıqaýynyń Bas júldesin Kemelbaeva Aıgúl Joldasbaıqyzy «Temirshe» áńgimesimen ıelendi.

---